退役後被私人保留嘅城巴利蘭亞特蘭大 AN68 型非空調巴士 A633，昨晚經檢查後，今日中午時份由工作人員駕駛到城巴屯門車廠。下午再由城巴拖車千里迢迢拖回黃竹坑車廠，準備進行修復工作。據悉巴士修復後將會在城巴 40 週年活動上亮相。
城巴嘅利蘭亞特蘭大 AN68 型非空調巴士喺八十年代製造，屬第一代後置引擎巴士。1993 年城巴以二手車形式由新加坡捷運（SBS Transit）嘅前身新加坡巴士服務有限公司（Singapore Bus Service Ltd）手上購入，以應付當年接收中巴 26 條專利路線下嘅車源短缺問題。城巴為保持車隊形象，徹底將呢批二手巴士車廂翻新，並換上同當時車隊中最新嘅利蘭奧林比安同款亞力山大 R 型頭幅，一掃舊車感覺。髹上城巴黃色車隊塗裝，但帶著古舊嘅軀體，令佢得到「黃老太」呢個外號。而 A633 就係其中一部。
A633 退役後曾被發配到城巴東涌車廠，與其他退役巴士一齊成為車廠同民居之間嘅「隔音屏障」，至 2011 年被拖走後，輾轉成為巴士收藏家嘅藏品保留至今。
＊相片由八九壹壹@ MOC Bus Association 提供，特此鳴謝 ＊
1 Trackback / Pingback