近幾年香港巴士來來去去都係嗰幾個型號，除咗幾部新能源巴士同最新幾部猛獅 A95 Facelift 12.8 米新車之外，好似真係冇乜新意🤷🏻♂️！咁不如等我哋帶大家睇吓一部喺噚日發佈，由印度設計同生產嘅全新電動雙層巴士啦！
「利蘭巴士」相信香港巴士迷都唔會陌生，至90年代初被富豪巴士收購之後，「利蘭」呢個名就剩返喺印度為基地嘅 Ashok Leyland 上出現。而 Ashok Leyland 嘅子公司 Switch Mobility 就係尋日推出咗印度第一部雙層電動冷氣巴士－EiV22。廠方指 EiV22 雙層巴士以單層版 EiV12 為基礎發展而成，但睇車身結構，筆者會相信 EiV22 係由 Ashok Leyland Titan 巴士進化而成多啲﹗🤡
車身長闊高 9800 x 2600 x 4750 mm，無論高度定闊度都並非世界一般雙層巴士標準。車廂內分別設有前後兩組樓梯，全車一共有65個座位，而資料指下層亦可以容納企位乘客。但係車我哋睇圖片所見到，上層車廂天花亦都設有扶手同吊環，以印度標準，你估乘客會唔會喺上層都企滿呢？下層地台離地距 900mm，廠方稱之為「Semi-Low Floor」。但由地面登上車廂平台，需要踏上三級，絕對同全球無障礙運輸背道而馳，下層當然不設任何輪椅空間，而車頭就設有「導航位」於輪拱上。車門設於車頭頭距後車尾尾跨位置，原意希望息客登車後可以盡量行入車廂，但實際應用係點就有待時間驗證。
電池方面，EiV22 採用231 kWh 嘅三元鋰電池組。雖然三元鋰電池能量密度較磷酸鐵鋰電池高，但過熱同過熱時熱失控嘅風險都較大。單次充電可以行走250公里。廠方指已經收到200部訂單，將會交付孟買 BEST 巴士公司，行走 Kurla 同 Colaba 之間路線。
基本資料就介紹完喇，以香港雙層巴士車隊發展成熟嘅眼光，去睇呢一款印度電動雙層巴士，可以話係「異類」。接近4.8米嘅車高、三級踏步嘅特站地台，加上兩軸之間嘅短軸距，可以話係同母公司生產嘅 Titan 巴士系列一樣，都係屬於上世紀嘅產品。但係話晒都係真真正正由印度本土自主研發，唔係抄襲而成，即管就當奇聞新知睇下都無妨丫！
圖片來源︰Switch Mobility、Telematics Wire、GearFliQ
Be the first to comment