台製電巴料往星洲試行

喺四月一號嘅時候，筆者曾經寫咗一篇右軑版本台灣鴻華先進科技 MODEL T 嘅文章，當時有唔少朋友都以為係愚人節 April Fools。但係接近一個月過去，終於有台灣朋友拍攝到更多呢部台灣生產嘅右軑電動巴士相片。

台製右軑 MODEL T 電動巴士

喺月初時，有台灣嘅網民估計呢部右軑巴士，會去日本或者泰國進行測試。但係喺噚日流出嘅相片入而，路線牌資料似乎透露咗呢部 MODEL T 電動單層巴士嘅落戶地點。

喺「台灣巴士文化協會」群組流出嘅相片中，可以清楚見到右軑版嘅 MODEL T 電動單層巴士喺外形上，完全同台灣本土左軑版本大致相同，只係駕駛室、車門位置被左右掉轉擺放。而車身外同樣安裝有 Smart Vision 電子倒後鏡鏡頭，車長可以透過車內兩個高清顯示屏觀察車後交通情況。而車頭、車尾嘅彩色 LED 電子路線牌上顯示住「22 ANG MO KIO INT」，為新加坡 SBS Transit 提供嘅服務嘅巴士路線，來往宏茂橋（Ang Mo Kio）同友諾士（Eunos）之間。

鴻華先進科技生產嘅 MODEL T 電動單層巴士全長12米，闊2.5米，高3.4米，係一部標準尺寸嘅大型單層城市巴士。首批量產車已經陸續喺高雄24區間路線，同台北智慧城市展接駁巴士線投入服務。而呢部右軑版樣板車上路線牌內容似乎就透露出端倪，講明呢款台灣製電動巴士第一個踏足國外進行測試嘅地方。係唔係成行，定係有機會前往其他國家同地區，就真係拭目以待。