冠忠拉伕清客忙 嶼巴日票入錢箱？

話說剛啱過去嘅農曆新年，新型冠狀病毒（武漢肺炎）令香港人無得外遊，好多人索性入東涌轉坐新大嶼山巴士喺大嶼山郊遊，引致東涌塞車又塞人。

【緊急呼籲？切勿前往大嶼山？】

遊客人潮由正月初一開始逼爆東涌（達東路）巴士總站、東涌站巴士總站，到初三情況越見嚴峻。

咁啱2021年農曆新年喺正週末，到2021年2月15號星期一年初四先至係「長假期」最後一日，遊客人潮依然浩大，人龍同之前一樣伸延到昂坪360東涌站側嘅空間、東堤灣畔/東薈城中間嘅廣場，以及附近街道。

新大嶼山巴士連同其母公司冠忠巴士已經加派人手同埋巴士疏導人潮，不過可能有部份巴士車長唔熟悉新大嶼山巴士嘅運作模式，面對乘客查詢出現「雞同鴨講」嘅情況。

本台喺2月15號仲收到市民報料，指購買咗新大嶼山巴士嘅「大嶼通」全日票，喺上巴士嘅時候，巴士車長檢查完之後「隨手」就將「大嶼通」全日票掟埋入巴士錢箱，要乘客提醒先至「如夢初醒」！

據報料市民所述，佢上車時對巴士車長話先放好手提袋再拎「大嶼通」畀巴士車長睇，當時巴士仲係停緊站，巴士車長就一邊招呼上車問路嘅乘客，一邊拎住張「大嶼通」嚟望，望完就「好好心」拎張「大嶼通」放入巴士錢箱，報料市民一路嗌「唔好擺」，巴士車長都「好順手」照樣掟咗入巴士錢箱。

之後巴士車長唯有就話：「你同啲司機講個情況啦！佢哋信你㗎喇！」，報料市民無奈拎架電話影低入咗錢箱嘅「大嶼通」，去到總站轉車時就拎張相畀當值職員睇，好彩都可以成功繼續行程。

至於講返東涌路面交通情況…就係繼續有好多區外假日司機齊齊玩「和你塞」！