2025/26年度嘅友邦嘉年華（ AIA Carnival ）已經喺2025年聖誕節前開幕，嘉年華入面滿佈熱情嘅人群、刺激嘅遊戲、閃爍嘅燈效以及強勁節拍嘅音樂，喧鬧嘅環境有機會令人感官過載，出現包括頭痛、心跳加速、感到煩躁等反應，神經多樣性社群尤甚。繼之前嗰年將1架退役雙層巴士改裝成自閉症群體專用嘅「A巴」，藝術共融團體Q Plus A藝術基金會（下稱Q+A）呢一年將「A巴」改造成「感官避風港」放喺友邦嘉年華載譽歸來。
作為全香港第1架專為神經多樣性社群設計嘅感官共融巴士，升級嘅「A巴」將「治療室內嘅感官支援」帶到去城市最熱鬧嘅社區現場，創造1個「降噪、調節、再出發」嘅安全空間，畀有感官挑戰但仍然想享受熱鬧嘅群體提供支援。除咗神經多樣性社群，Q+A相信每個人都需要喺適當時間調節情緒，希望「A巴」能夠成為有需要市民嘅臨時喘息空間，覓得身心平靜以及調整之後再起行。
神經多樣性係指一個人嘅大腦以唔同方式嚟處理接收到嘅訊息並且同外界溝通以及互動，唔同人喺人類神經學上有個體上嘅差異，並且具有潛在嘅優勢、劣勢，當中嘅「與別不同」唔一定係「疾病」或者「異常」。
然而，常見被公眾認為「異常」嘅類型包括發育遲緩或智力障礙、自閉症譜系障礙（ASD）、專注力失調及過度活躍症（ADHD）、特殊學習障礙、讀寫障礙、運用障礙、抽動綜合症。據估計，全世界大約有15~20%人口屬於神經多樣性人士。當神經多樣性群體面對過多感官刺激嗰陣，比較難有效處理信息，從而產生同他人唔同嘅感受，引發生理反應，例如皮質醇水平上升，進一步加劇壓力。持續感官過載會影響情緒，導致社交同埋行為問題，因此，嘉年華等喧鬧場景對唔少神經多樣性人士嚟講係一個充滿挑戰嘅環境。
策展人兼Q Plus A藝術基金會創辦人臧傲珊小姐（Amy）表示：「好榮幸『A巴』能夠再次駛入嘉年華，畀公眾即使身處喧鬧，都能夠搵到一個寧靜空間重整自己。今年『A巴』車內升級更多種感官支援同埋互動裝置，同時透過模擬體驗以及共融工作坊，畀公眾由親身感受出發，了解神經多樣性社群嘅挑戰，思考點樣實踐真正共融。同時，面對外來壓力同埋過量感官刺激，任何人都可能有感官同埋情緒調節嘅需要，期望『A巴』成為城市嘅心靈喘息站，透過寧靜室同埋感官調節裝置，調整身心、重新出發。」
當公眾喺嘉年華入面出現感官過載嗰陣就可以隨時走入「A巴」稍作休息。「A巴」中嘅燈光都係可以調校，並且有隔音設計，以減低視覺以及聽覺轟炸，畀大腦有機會「降噪」。呢項設計同醫院、精神健康服務所用嘅「感官室」一樣，透過低刺激環境，有助人冷靜落嚟，減少不安同埋激動反應。嘉年華入面嘅機動遊戲，往往會帶有唔同視覺效果，因此有需要人士可以喺「A 巴」燈光柔和以及安靜嘅角落坐下，慢慢深呼吸，畀視覺以及聽覺都能夠稍作休息。
註冊職業治療師Fiona LEE講到，「A巴」下層設有「感官調節」聽樂體驗，呢啲係一種由職業治療界發展嘅「聲音為本介入」（sound-based intervention），為大腦提供有組織嘅聽覺刺激，配合身體動作以及呼吸，促進感覺處理、自我調節、專注以及情緒穩定。大型統合分析顯示，音樂治療／音樂聆聽對生理以及心理壓力起到中度以上減輕效果，包括調低心跳、血壓、壓力荷爾蒙（如皮質醇），從而顯著減少主觀焦慮。當公眾喺嘉年華嘈雜嘅環境之下，可以喺呢個區域戴上耳機，靜靜咁聽音樂10~15分鐘，一邊維持慢呼吸，達至減壓效果。
聆聽音樂過後，可以走到下層尾端嘅「觸覺感官牆」，牆上有唔同嘅紋理區域，提供由柔軟到有阻力嘅觸覺和本體覺（肌肉關節感覺）輸入，參觀者可以用雙手重複動作，為多餘能量提供一個安全出口。當感到心煩意亂或者手腳不由自主咁活動，可以選擇手感舒服嘅區域，一邊慢呼吸，一邊重複捏、搓、推、滾等動作1~3分鐘。
走到「A巴」上層嘅寧靜室入面，呢度設有重壓被、豆袋櫈，提供深層觸壓，安撫神經系統。有需要嘅公眾可以將重壓被冚到膊頭以至腰部，或者坐喺豆袋櫈上面，感受被承托、包覆，並且配合慢呼吸大約 5~10 分鐘。除此以外，亦可以使用平衡板，重新「感受自己身體」，刺激前庭系統（平衡）同本體覺系統（肌肉關節感覺），幫助穩定情緒。
Amy補充：「隨着感官需要更被重視，世界各地愈來愈多醫院、精神健康服務、社區機構增加各類感官支援設施，公共空間亦陸續引入感官友善設計，例如新加坡樟宜機場設立『感官空間』，以及南澳洲政府推出嘅『感官巴士』，都有透過感官房、深壓工具、觸覺小物、音樂、柔和燈光，幫助相關群體減壓、穩定情緒以及恢復專注。『A巴』希望為有需要嘅公眾提供一個安全空間，以唔同感官輸入方法，搵到最適合自己降噪、冷靜、重新出發嘅方法。希望公眾離開巴士，再走返入去嘉年華嗰陣，會覺得『我仍然可以享受熱鬧，但我都有方法幫自己喺喧鬧中保持平穩』，藉此推動香港成為一個感官友善城市。」
除咗感官裝置外，Q+A亦邀請公眾喺巴士上以畫作自由隨心咁描繪自己嘅臉孔、情緒或者感官符號，真誠展現獨有嘅樣貌以及感受，並且同現場其他作品拼貼結合，共同參與「織共融」。藝術唔只係無障礙嘅創作途徑，畀有需要人士表達自我，更加係成為連結神經多樣性人士同埋大眾嘅橋樑。透過藝術，畀每個人得以睇到同埋理解彼此，欣賞差異，擁抱多元，共同編織更包容嘅社區。另外，巴士車廂亦設有3段感官過載錄音，畀公眾感受神經多樣性群體每日面對嘅感官過載生活。
Q+A會聯同社區伙伴舉辦多場工作坊以及共融活動，促進共融參與，「A巴」亦安排神經多樣性人士（包括自閉症人士）做日常當值人員，期望提供更多工作經驗同埋接觸社會大眾嘅契機。
透過「A巴」呢架感官共融巴士，Q+A期望為神經多樣性群體提供更多支援，並且希望呢份關懷延伸到更廣泛嘅公眾，關顧每個人嘅身心需要，畀大家喺面對種種挑戰嗰陣，能整理思緒，繼續前行。
至於呢一年嘅「A巴」除咗推廣共融之外，亦講求環保，據推廣可持續廣告製作方案，涵蓋設計、生產、回收、驗證嘅Senkoo創辦人Joseph LUK所講，繼善用退役雙層專營巴士（前・新巴富豪超級奧林比安 12米版本雙層巴士，車隊編號：5060，車輛登記：JY1603）之後，巴士車廂下層尾端嘅「觸覺感官牆」就係不含PVC而且係混合利用咗三維打印嘅塑膠廢料所造，而巴士車廂入面嘅介紹板都用上可再造紙質物料，至於車身外觀所用嘅貼膜都係可以再造嘅物料，務求以減少廢棄物嘅方式舉行活動。
| 日期 | 2025年12月22號到2026年3月1號 |
| 時間 | 非高峰日子：1200~2200 普通日子及高峰日子：1100~2300 |
| 地點 | 香港 中環 龍和道9號 中環海濱活動空間 友邦嘉年華 |
| 報名 | 共融活動報名可以撳入去呢個連結。 *神經多樣性相關人士可以發送電郵去[email protected]。電郵標題註明 「索取邀請碼」，並附上 《殘疾人士登記證》以作核實。Q+A 將會回覆邀請碼，以供網上平台報名時使用 |
Be the first to comment