巴士台一直致力協助唔同組織，宣揚利用公共交通工具傳播正確看待唔同社群嘅特殊需要，推動共融社會。巴士台喺過去曾經報道過：
2025年，對公眾嚟講，嘉年華係與眾同樂嘅地方，但對自閉症譜系障礙 （簡稱自閉症）群體嚟講，要到此一遊可能極具挑戰。
2024/25年度友邦嘉年華（ AIA Carnival ）入面，公眾可以見到1架巴士停泊喺會場入面——呢架巴士係由順豐速運（香港）有限公司（ 順豐速運 – 香港 下稱「順豐香港」）贊助、藝術共融團體Q Plus A藝術基金會（Q+A art foundation 下稱「Q+A」） 策劃嘅「順豐速運A巴」。
「順豐速運A巴」由1架退役雙層巴士（前・新巴富豪超級奧林比安 12米版本雙層巴士，車隊編號：5060，車輛登記：JY1603）改裝，係全香港第1架專為自閉症群體設計嘅巴士，率先喺2025年初友邦嘉年華亮相。
呢架「A巴」唔單只為自閉症群體提供場地支援，畀佢哋有機會同普羅大眾一齊享受嘉年華；仲畀公眾有機會親身體驗自閉症人士喺外出嗰陣面對嘅挑戰，從而啟發公眾思考點樣支援社會上有唔同需要嘅人士，實踐共融。
自閉症譜系障礙 （簡稱自閉症）係1種與生俱來嘅發展障礙，令自閉症人士喺社交溝通以至認知、情緒、行為、感官反應多方面出現唔同程度嘅困難同埋發展差異。
自閉症有時被稱為「隱形嘅障礙」，因為公眾無法透過外表判斷1個人係唔係患有自閉症，而自閉症人士可以係任何年齡、性別、種族，而大約有7成自閉症人士被界定為智障。
由於自閉症人士嘅感官反應比一般人大，照顧者同佢哋外出嗰陣往往會遇到各種困難以及難堪情況，而「對唔住」就成為咗照顧者嘅「口頭禪」。
順豐速運港澳地區負責人岑子良先生喺「A巴」開幕禮致辭嗰陣表示：「我哋好高興見証著『順豐速運A巴』共融主題巴士嘅誕生，並且喺盛大嘅友邦嘉年華之中展覽。大眾除咗可以體驗嘉年華歡樂嘅活動之餘，更可以參與『A巴』共融活動加深了解自閉症群體。唔同嘅慈善團體亦能夠喺『A巴』上舉辦多元化主題活動，促進自閉症群體同社會大眾嘅聯繫。順豐香港作為物流公司嘅責任唔單只重視提供優質物流服務，更加致力喺善用資源回饋社會。我哋希望建立1個畀唔同能力同埋背景嘅人能夠相互連結嘅社會，鼓勵彼此尊重、接納同埋包容，實踐共融社會。」
策展人Q Plus A 藝術基金會創辦人臧傲珊小姐就講到：「『順豐速運A巴』嘅『A』係Accessibility （無障礙）、Autism （自閉症社群）、 Art （藝術） 以及All （共融）。當自閉症、智障人士以及佢哋嘅照顧者喺日常外出嗰陣能夠輕鬆自在，毋須擔心遭受排斥以至孤立，亦唔會感到焦慮同埋無助，呢樣先至係真正嘅社會共融。希望透過呢次展覽，畀政府、各大公眾場所以及公眾明白，唔單只肢體殘障人士需要無障礙設施，自閉症社群同樣需要。Q Plus A藝術基金會好開心得到順豐香港全力支持實踐全香港港第1架感官友善巴士，期望『A巴』能夠走入社區各處，為有需要嘅群體喺暄鬧環境中提供寧靜空間。」
「順豐速運A巴」社區項目分多個階段進行，Q+A事前向大約200名自閉症群體嘅照顧者、社工以及教師收集問題，並且同當中100位進行咗訪談，了解佢哋日常同自閉症群體外出嗰陣面對嘅狀況同埋困境。
調查發現，95%受訪者認為普遍公共場所缺乏針對自閉症群體設計嘅友善環境，97% 認為公共場所嘅職員缺乏能力去應對自閉症群體嘅需求，亦有95% 受訪者表示喺外出嗰陣曾經遭受到唔同程度嘅歧視。
Q+A憑藉調研訪談結果，設計出《3S通》——香港首個專為自閉症群體設計嘅場地配套指南，重點關注社交（Social）、感官（Sensory）、自主（Self）3大方面，旨在支援佢哋有更輕鬆自在嘅場地體驗。
《3S通》會喺「順豐速運A巴」展出，並且畀公眾下載，希望藉此為唔同場所提供藍本，加設對自閉症群體設計嘅友善環境，以及畀公眾學習應對群體需求嘅技巧。
「A巴」下層除咗有展覽，仲設有聲音體驗，畀公眾走入自閉症群體嘅感官世界，了解照顧者嘅心聲。下層有「等你的明信片」，展出100張嚟自閉症小朋友手畫嘅明信片，參觀「A巴」過後，參觀者亦可以為自閉症小朋友創作明信片，彼此透過明信片嘅畫作以及文字交流同埋連結。
感官過載（Sensory Overload）係自閉症人士常見嘅問題——當佢哋面對過多感官刺激嗰陣，會難以有效處理信息，從而產生同其他人唔同嘅感受，生理上引發例如皮質醇水平上升嘅反應，進一步加劇壓力。持續嘅感官過載會影響情緒，導致社交以及行為問題，呢啲亦係照顧者以及自閉症人士外出時會遇到嘅困難。
研究顯示，提供安靜嘅環境有助於減少刺激、促進情緒調節以及心理放鬆。Q+A喺「A巴」上層設有全香港第1個設喺公眾地方嘅寧靜室，為群體提供舒適、安靜、柔和嘅環境，減少不必要嘅感官刺激，並且增設軟墊以減少佢哋受傷嘅風險。
身處寧靜舒適嘅空間，聽故事、做手工等都係解壓體驗。因此，「A巴」喺嘉年華入面展出期間亦舉行超過20場藝術共融活動，包括講座、真人圖書館、工作坊等，費用全免，畀自閉症群體、公眾以及順豐速遞員都能夠加深對自閉症嘅認識。
Q+A期望能夠推廣「寧靜室」概念，畀有需要人士喺公共空間獲得片刻安靜嘅機會，舒解壓力。活動期間，Q+A發起「寧靜是感官的新革命」籌款活動，希望籌得港幣50萬元，為香港10個公共場所提供寧靜室。
Be the first to comment