
隨著九龍巴士(1933)有限公司(九巴)喺1990年代尾推出賀年生肖巴士,香港各間專利巴士公司都發展到每年都有各自嘅賀年生肖巴士,新大嶼山巴士(一九七三)有限公司(嶼巴)旗下嘅2025乙巳蛇年生肖巴士就喺2025年1月10號正式亮相。
2025年1月29號正好係乙巳蛇年正月初一,傳統上有唔少香港人都會選擇喺正月初一「行大運」,咁不如就由紅磡去昂坪?
正當講起歷年嘅嶼巴生肖巴士主要出現喺大嶼山、元朗、天水圍等地區,2025年嶼巴就捉咗蛇年生肖巴士出九龍同公眾拜年 🐍🐍!
嶼巴喺2025乙巳蛇年正月初一就安排咗嗰架披上咗賀年生肖拉花嘅MAN RC2 LE 19.320型單層巴士(車隊編號:MN94,車輛登記號碼:TT1858)出到去九龍市區,行走旗下唯一一條連接九龍以及南大嶼山地區嘅1R號巴士路線(紅磡(紅鸞道)→昂坪)嘅0915時加班車班次。
據講呢次除咗係嶼巴第1次安排生肖巴士行駛九龍區路線之外,同時亦都係嶼巴旗下MAN RC2 LE 19.320型單層巴士第1次服務九龍區!

嶼巴呢架蛇年生肖巴士喺朝早大約9點到達紅磡華信街,仲停低咗喺路邊稍作停留,畀一種巴士迷影返張靚相。

畀大家影相影咗幾分鐘之後,嶼巴呢一架蛇年生肖巴士就喺0911時駛入位於紅磡灣紅鸞道38號香港嘉里酒店基座嘅紅磡 (紅鸞道)公共運輸交匯處。

現場有幾十名巴士迷一早喺度排隊準備乘搭呢班1R號巴士路線嘅特別加班車,秩序大致良好。

嶼巴為咗感謝一眾支持乘搭呢一班1R號巴士路線特別加班車班次嘅乘客,凡係乘搭呢一班特別加班車班次嘅乘客,喺登上巴士嘅時候會獲得嶼巴2025乙巳蛇年特別紀念版海報同埋明信片,將「喜氣洋洋 蛇來運到」帶返屋企。

嶼巴呢一次安排嘅蛇年生肖巴士行走1R號巴士路線特別班次,最終能夠準時喺0915時開出,行經尖沙咀、旺角、深水埗、東涌、塘福,去到終點站昂坪公共運輸交匯處。
為免影響到正常乘搭呢一條路線由九龍前往昂坪「行大運」嘅其他市民,嶼巴特別指明生肖巴士係行走加班班次,同一時間會有另外一架由冠忠遊覽車提供嘅單層巴士開出,作為正常班次接載一般市民。
除咗可以捕捉嶼巴呢一架蛇年生肖巴士出沒九龍之外,公眾仲可以帶埋「佢」返屋企過年㗎!嶼巴蛇年生肖巴士嘅1:76模型經已推出,模型上面顯示嘅巴士路線係好似蛇仔一樣嘅2號(往梅窩碼頭),有興趣嘅朋友可以去到 Network Shuttle 門市或者網店選購㗎!
Be the first to comment