
老一輩成日都話以前臨近歲晚就會趁著「過年」前炒緊啲人,隨著時代變遷,呢種話題仍然係每年都有人攞返出嚟講。
2025年1月26號嘅年廿七,連登討論區就有1篇題為《港島果間巴士臨新年前又炒左(咗)50人》嘅發文,內文指「文職、整車、司機同學徒都有,全部上星期五六收信,重災區維修部。所以唔好再話巴士等得耐,係x街公司唔夠人都炒」

基於依家香港島嘅專營巴士營辦商就只有城巴有限公司(城巴),連登討論區以上嘅發文明顯係針對城巴,當有指係「年尾炒人可以慳雙糧」呢種「傳統智慧」嘅同時,有網民就會問返「有無資料來源定係吹水post…?」
經過向城巴企業傳訊部查詢,城巴回應指留意到互聯網上有暗指佢哋公司嘅失實指控,佢哋公司對此深表憤怒,對於呢次散播謠言嘅事件,佢哋公司已經報警,並且保留權利追究發表有關失實發文嘅發文者。
至於連登討論區發文所講嘅「炒人」,城巴強調絕無其事,現時並無亦未有計劃裁員,目前為咗持續拓展業務、秉持為顧客提供優質巴士服務嘅使命,依家正係不斷積極招聘人才加入。
巴士台提醒返大家,根據香港現行法例,大部分喺現實世界用以防止罪行嘅法例,都係適用喺互聯網世界——上網「鳩噏」同樣係有相關法律責任。
Be the first to comment