元旦倒數後通宵跨境巴士服務 疏導中國旅客 往年亂象不復見

之前提及過2024年倒數去2025年元旦嘅跨年活動之後，香港公共交通服務以及各個陸路口岸都會有延長特別服務。

2025年元旦日特別通關安排及相應公共交通服務

呢一次嘅安排相信係當局汲取咗2023年倒數去2024年元旦嘅教訓——嗰陣跨年活動之後大批嚟自中國大陸而拒絕投宿賓館酒店嘅旅客集體「瞓街」，情況猶如中國大陸陷於戰爭，中國人流離失所，新年流流淪為跨境「難民」嘅醜態。

其中落馬洲、深圳灣、港珠澳大橋喺2025年元旦凌晨維持通宵通關服務，香港多間跨境巴士服務供應商亦因此維持通宵服務。

就住呢一個情況，本台派出記者視察之前一年因為嚟自中國大陸而有拒絕投宿賓館酒店嘅旅客報稱「無得過關返屋企」而發生騷亂，結果搞到要出動警察機動部隊、幾乎搞成警氓衝突嘅太子跨境巴士站。

現場可以睇到，旺角警區派出警車封鎖介乎太子道西以及荔枝角道之間嘅一段砵蘭街，並且設置橙帶以及欄桿劃出排隊區畀報稱需要過關嘅旅客等候跨境巴士。

現場所見2025年嘅元旦日凌晨，呢一批嚟自中國大陸而唔肯投宿賓館酒店嘅所謂旅客，喺現場多名警員監視之下都肯有秩序排隊等候跨境巴士。

根據現場跨境巴士服務營辦商職員所講，佢哋會因應市區多個巴士站嘅旅客排隊人數，靈活調動唔同站頭嘅跨境巴士接載呢一班旅客離開香港。

之前一年有班號稱搭唔到車過關返屋企又唔肯畀錢投宿賓館酒店嘅所謂旅客，佢哋同跨境巴士職員以及警方發生衝突嘅太子康民閣，事隔一年之後，滯留嘅所謂「旅客」，人數明顯減少，秩序亦見有所改善。

至於喺太子跨境巴士站附近嘅連鎖快餐店分店，之前一年曾經因為被嗰班號稱搭唔到車過關返屋企又唔肯畀錢投宿賓館酒店嘅所謂旅客「佔領」，周圍瞓到除咗瞓滿地板以至瞓上埋收銀台以及出餐枱等「新年流流搞到猶如以巴衝突現場」嘅情況，一年之後未見重現，喺快餐店入面瞓嘅所謂旅客明顯減少。

呢班所謂旅客表示，能夠可以喺跨年倒數之後有機會返到屋企感到高興，但係佢哋非常不滿香港跨年活動之中「成街都係中國人」，唔少旅客接受訪問嘅時候都話佢哋本身諗住落嚟香港參加跨年活動「就係諗住要避開其他中國人」，結果未能如願，認為「香港人從來都係搵緊佢哋笨」。但係問及佢哋會唔會因為咁樣而唔再嚟香港，佢哋有表示香港係佢哋唯一可以「出國」嘅地方，所以係「被迫」要嚟香港玩。