當年因為尖沙咀海運大廈處理唔到超大型郵輪，搞到有啲郵輪要停泊葵涌貨櫃碼頭，遊客要喺漫天貨櫃同起重機之下上落郵輪，明顯大大打撃香港「應該接待高檔遊客」嘅國際形象。
有見及此，當局決定興建新嘅郵輪碼頭，用以處理超過尖沙咀海運大廈力所能及嘅新一代超大型郵輪，啟德郵輪碼頭應運而生。啟德郵輪碼頭開幕之初，有啲世界重量級郵輪公司紛紛派出當時佢哋旗下最新型或者係旗艦級嘅郵輪到訪香港，開拓以香港為中心嘅東亞郵輪航線。
然而，香港向來規劃都係嬰兒學行咁慢慢嚟，結果啟德郵輪碼頭由一開幕就睇到週邊好明顯有配套問題，加上其他不能言喻嘅原因，原本雄心萬丈想喺香港大力發展東亞航線嘅國際大型郵輪公司紛紛捨棄香港，改去新加坡或者臺灣。
其中一個最顯然易見嘅情況就係來往啟德郵輪碼頭嘅公共交通服務乏善足陳，起初因為係有大型嘅國際重量級郵輪公司停靠香港，接待高檔嘅遊客嘅郵輪公司自然有能力提早安排，多次租用大型觀光巴士直接接載遊客遊覽香港。不過香港好得意嘅，無論幾多大型嘅國際郵輪公司都好想嚟香港，始終有啲原因限制住香港只係雲頂集團先至可以長玩長有——
呢一個檔次嘅遊客呢…就…
隨著新型冠狀病毒（武漢肺炎）搞亂全世界3年幾，停頓咗一段日子嘅郵輪旅遊再次返嚟香港，當局煞有介事咁覺得係一個新嘅開端——無錯，佢哋真係覺得好似由零開始過咁。
2023年啟德郵輪碼頭重新接待國際遊輪，不過嚟嚟去去其實都係名勝世界郵輪旗下嘅「名勝世界壹號」，次次都硬係搞到啟德郵輪碼頭公共交通接駁醜態百出——等陣先，「名勝世界壹號」其實咪即係星夢郵輪嘅「探索夢號」，亦即係麗星郵輪嘅「處女星號」，以前停泊喺尖沙咀海運大廈相安無事㗎喎！
頭先都話過雲頂集團呢…
呢一個檔次嘅遊客呢…就…
不過呢個檔次啲客買嘢既唔捨得畀錢，自然又嫌搭的士貴㗎啦！所以出現一個現象就係明明郵輪停泊喺香港嘅時間唔長，遊客要遊覽香港會好趕時間，但係的士無遊客搭，成班遊客就排隊等好疏先至一班嘅公共巴士，簡簡單單一隻唔係大嘅郵輪喺公共交通接駁上都搞度醜態百出，當然就逼咗一啲高薪厚祿嘅官員去做下大龍鳳啦！
有見及此，當排水量比「名勝世界一號」多一倍幾、皇家加勒比國際遊輪旗下嘅「海洋光譜號」喺2023年8月19號再次到訪香港嘅時候，當局終於逼多間交通公司準備定接待遊客。
當然依家啟德郵輪碼頭嘅最主要公共交通服務就係專營巴士，當局就一早準備定一啲指示牌提示遊客可以搭巴士出去市區遊覽——唔好理啲字咁細粒睇得辛苦，長官覺得「做咗就係做咗」。
至於依家服務緊啟德郵輪碼頭嘅兩間專營巴士公司——城巴以及九巴——都貼出告示教遊客點樣畀錢搭公共巴士，城巴亦都安排咗員工設立簡易服務站解答遊客搭巴士嘅疑難。
至於原本一直提供緊嘅專營巴士路線，雖然話係特別服務啟德郵輪碼頭，但喺九龍嘅另一邊其實並唔係屬於遊客熱點，當局都「𠱁」咗巴士公司再開一啲特別服務路線，例如直達尖沙咀嘅20R號路線，仲有唔使錢車遊客去到啟德站轉搭港鐵嘅22R號路線。
用車方面，22R號路線竟然有機會出現前．新巴「波浪紋」拉花嘅12米版本Enviro500 MMC雙層巴士（車隊編號：5839，車輛登記：WB4285）？！
一到香港就見到Farewell🥹
呢啲都係留返畀大家慢慢捕捉啦！或者最重大重新配置嘅公共交通策略係呢個：
當局諗到搵一堆旅遊巴士設立免費穿梭巴士服務，提供3條路線：
- 啟德郵輪碼頭←→旺角港鐵站
- 啟德郵輪碼頭←→金鐘港鐵站←→花園道山頂纜車總站
- 啟德郵輪碼頭←→尖沙咀文化中心←→西九故宮博物館←→九龍港鐵站A出口
當局咁樣搞呢個安排，如果你係遊客…
覺唔覺得好難選擇呢？
話晒郵輪泊岸有時都係前後得幾個鐘，例如話搭咗免費穿梭巴士出去，其實都幾易錯過咗回程？而喺一個人生路不熟嘅地方，突然間要去返啟德郵輪碼頭，一係唔識得搭普通嘅公共巴士，一係就被的士佬「劏到一頸血」…
應該都幾驚嚇
Be the first to comment