【生日應援】阿Day生日應援巴士穿梭九龍鬧市 賀22歲生日

2002年6月4號出世嘅香港女藝人許軼（Day），因為喺ViuTV嘅選秀節目《全民造星IV》之中得到季軍，其後成為香港女子組合COLLAR成員兼MakerVille合約女藝員。

承接住2023年嘅應援巴士，臨近2024年阿Day嘅22歲生日，佢嘅一班「Day B仔」支持者繼續經「Day HK Fans Club」統籌，繼續搵返九巴整咗1個巴士全車身廣告上1架12米版本Dennis Trident E500雙層巴士（車隊編號：ATENU1595，車輛登記：VS4306）。

2024年版「Day巴」嘅生日應援全車身廣告以「Pawfect Day Bus」為主題，用白色同粉紅色做主調，配上黑色格仔紋，以及不可或缺嘅靚靚阿Day大頭相，喺鬧市之中穿梭份外鮮明。

除咗巴士車身上面嘅全車身廣告之外，乘客登上「Day巴」車廂都會見到唔少相關嘅佈置，由車上嘅旁板、每層嘅天花、以至乘客座椅嘅櫈背，全部都有唔同造型嘅阿Day大頭相同埋祝佢生日快樂嘅標語。

如果乘客去到「Day巴」上層，坐喺座位抬頭向上望，仲會見到阿Day唔同表情嘅貼紙；巴士上面嘅電視機亦都會間歇播放阿Day嘅一啲片段，相信一眾「Day B仔」都會好興奮！

「Day巴」會安排喺九巴1A號路線行駛，來往尖沙咀天星碼頭以及中秀茂坪，途經油尖旺、九龍城、觀塘等地，各位「Day B仔」記得唔好錯過喇！

除咗想要對阿Day講返聲「生日快樂」之外，喺呢度都希望2024年版嘅「Day巴」唔好好似2023年嗰架咁樣，遇到打風就吹爛晒啲玻璃啦！