Big Bus Tours觀光巴士　迎戰五一黃金週

上回講到嚟緊嘅5·1黃金周，預計會有大批內地旅客訪港。除咗專利路線嘅城巴人力車觀光巴士會喺黃金周假期期間加派新車，並且加密班次疏導旅客之外，另一間喺香港專營觀光旅遊開篷巴士業務嘅國際品牌－Big Bus Tours 亦都為黃金周訪港嘅旅客作出準備。

Big Bus Tours 喺全球超過20個國家及地區營辦開篷觀光巴士，係全球目前最大嘅開篷觀光巴士公司。由2008年起，喺香港開設定線定點嘅班次性開篷巴士路線，比人力車觀光巴士，仲要早一年出現。

為咗應對黃金周嘅旅客，Big Bus Tours 由2024年4月30號開始，早上嘅日遊班次將會作出改動：

-由中環開出，途經上環、荷李活道、灣仔、銅鑼灣、以及山頂纜車站嘅🔴紅色路線，將會由45分鐘一班加密至30分鐘一班；

-由中環出發，途經山頂纜車站、深水灣、淺水灣、赤柱廣場、香港仔舢舨碼頭嘅🟢綠色路線，將會由一個鐘頭一班，加密至45分鐘一班。

-而自新冠肺炎疫情肆虐期間停辦嘅九龍🔵藍色路線，亦將會由同日起復辦，並且採用全新行車路線。由尖沙咀出發，途經海防道、彌敦道、油麻地天后廟、果欄、朗豪坊、高鐵站、M+博物館、故宮博物館、環球貿易廣場、廣東道，以及紅磡站。

有見Big Bus Tours 嘅🟣夜遊班次而家晚晚都爆滿（只開放上層座位），所以由4月30號開始，除咗更新夜遊路線途經旺角、女人街、廟街、果欄、西九文化區、天際100觀景台，及尖沙咀海濱長廊之外，亦都由過往兩個時段同時開出三班車，加密至由晚上19:00起至20:30期間，每10至15分鐘一班車，客滿即開，希望可以疏導並且吸納更多想乘搭開篷觀光巴士嘅旅客。

新嘅九龍線、夜遊以及港島線都更換咗全新嘅個人語音導覽系統，有八種唔同語言嘅沿途導賞介紹，令旅途中可以深度了解香港。而赤柱線亦都會喺稍後進行更新。

此外，Big Bus Tours ⚪️大嶼山觀光巴士線自去年11月開辦以嚟，因為途經北大嶼山快速公路來往東涌䌫車站、迪士尼樂園，以及機場島，並且喺天氣晴朗嘅下午駛入機場跑道南環路嘅時候，可以睇到壯麗嘅日落景色，所以喺國內社交媒體《小紅書》上被網民冠以「 #落日飛車 」嘅名號。其後「落日飛車」一詞，更被廣泛形容香港所有開篷巴士服務。

作為「落日飛車」嘅始祖，Big Bus Tours 大嶼山觀光巴士線喺五一黃金周假期期間，仍然會由早上10:20開始至傍晚17:30期間，每日開出七個班次，一張車飛，全日有效，令你喺體驗完昂坪360纜車以及昂坪市集、天壇大佛之後，可以繼續喺東涌開始探索大嶼山北部嘅其他旅遊景點。

總括嚟講，香港旅遊業對於5·1黃金周假期有足夠嘅準備，包括加密巴士班次以及調整路線，同埋提供更多嘅服務，目的係為嚟香港嘅遊客提供更好嘅旅遊體驗。不論係開篷觀光巴士定係其他旅遊活動，香港都會以佢獨特嘅魅力吸引唔少遊客。