原本旨在展示日本綠色交通未來嘅大阪世界博覽會自動駕駛電動穿梭巴士，已經喺日本演變成全國最令人尷尬嘅公共安全醜聞之一。
總部位於北九州嘅新創公司EV Motors Japan（以下簡稱「EVMJ」）為2025年大阪世界博覽會提供電動巴士，結果卻深陷一場不斷擴大嘅危機，涉及車輛普遍存在缺陷、涉嫌偽造安全報告、大規模召回，至今搞到創始社長佐藤裕之辭職。
比亞迪、遠程被踢出局——EVMJ神奇中標
分析EVMJ本身之前，首先必須了解EVMJ當初係點樣贏到大阪世界博覽會合約，以及點解資格預審成績遠勝於EVMJ嘅比亞迪反而被踢走。
大約喺2022年，「大阪市高速電気軌道」（即係「大阪地下鉄」）旗下嘅「大阪市巴士」（大阪シティバス）喺同中國製造商江蘇常隆客車有限公司嘅産品進行對比測試之後，已經選定「比亞迪K8」作為大阪世界博覽會嘅大型電動巴士，相關項目嘅工作人員完成晒內部評估，一切準備就緒…但係…當採購方案提交畀母公司「大阪地下鉄」嘅時候，「大阪地下鉄」嘅高層主管就指示項目工作人員「評估」埋一間叫「EV Motors Japan」嘅公司所提供嘅巴士——高層主管指示完之後，比亞迪方案被靜靜雞擱置，而且喺無進一步公開競爭嘅情況下，EVMJ獲得為大阪世界博覽會供應100架巴士嘅合約，後嚟再增加到150架。
大約同一時間，大阪世界博覽會組委會亦接觸咗其他一啲知名嘅中國製造商——包括吉利汽車旗下商用車子公司遠程汽車，但其後就被通知「大阪嘅世界博覽會想要日本製造嘅電動巴士」…比亞迪、遠程汽車其實都只係因為呢一句而被踢出局，諷刺嘅係：
日本公眾後嚟知道，EVMJ提供嘅電動巴士都唔係日本製造——連喺日本裝嵌嘅都無！
業內人士向日本傳媒嘅調查記者指出，時任日本経済産業大臣西村 康稔憑藉佢喺政壇上嘅強大影響力，要求大阪世界博覽會大力推動「國產」（按：日本）電動巴士。基於呢種政治壓力，曾經大肆宣傳會計劃喺北九州建立日本國內裝嵌廠嘅EVMJ就被定位做「日本」代表—-—
不過呢間所謂北九州裝嵌工廠喺大阪世界博覽會前後
以至嚟到2026年…都仲係未生產過任何一架車。
EVMJ為咗交貨，於是就搵咗3間中國嘅車輛製造商：
- 威馳騰
- 恆天
- 愛中和
根據日本傳媒嘅調查記者所講，用返日本審批嘅標準，EVMJ搵嚟呢3間中國嘅車輛製造商，規模相對較細，經驗略顯不足…而調查期間最覺得奇怪嘅係，呢3間中國嘅車輛製造商好似都只生產出口型車輛：尤其當時已經發現呢3間中國嘅車輛製造商生產嘅車輛都並無獲得中华人民共和国工业和信息化部認證，理論上根本無法喺中國國內市場銷售。而且調查期間，呢3間中國嘅車輛製造商都有回覆表示佢哋都係首次為日本市場生產巴士。
相較之下，比亞迪喺過去10年間向日本巴士營運商供應咗大約500架電動巴士，而日本全國近30間巴士營運商喺調查期間嘅回覆都指：
比亞迪嘅可靠性「記錄良好」
其實不如買返比亞迪
EVMJ：一間崛起之路頗為可疑嘅新創公司
EVMJ喺2019年4月1號正式成立，報稱可以提供一系列電動巴士，但並非製造商。一直以嚟，EVMJ嘅商業模式就係由上述3間中國車輛製造商生產電動巴士，原架成品巴士入口到日本，然後出售畀日本巴士業界。
即使當時EVMJ日本國內銷售記錄奇缺，但偏偏喺2022年中標得到為大阪關西世界博覽會供應100架電動巴士嘅合約，後嚟數量仲增加到150架，當中分別係35架小型巴士以及115架大型巴士，用嚟喺大阪世界博覽會會場內外接送遊客——大阪世界博覽會官方網站仲標榜呢啲電動巴士係世界上「最先進嘅電動巴士」。
EVMJ得到為大阪關西世界博覽會供應電動巴士嘅合約之後，日本多間巴士營運商，包括阪急巴士、伊予鐵巴士、富士急巴士、東急巴士等隨即紛紛採購EVMJ供應嘅電動巴士，去到2025年初，已經有超過300架由EVMJ供應嘅電動巴士喺日本全國營運。
然而，雖然EVMJ一直打着「喺日本國內生產電動巴士」嘅旗號，呢啲由EVMJ供應嘅電動巴士完全係中國製造、中國組裝、原車成品進口日本——EVMJ曾經聲稱2023年底會喺北九州市建成了一座裝嵌工廠，計劃將出售嘅電動巴士轉去日本國內裝嵌，但係正如上文所述，截至2026年初，嗰間工廠仲未生產出過任何1架巴士。
呢啲就好明顯睇得出EVMJ根本喺度出緊古惑
唔理廠方質疑 由一開始就不斷出問題
2025年4月13號大阪世界博覽會開幕之後，EVMJ提供、安裝由日本先進モビリティ株式会社提供自動駕駛系統嘅電動巴士幾乎立即出現問題。「大阪地下鉄」安排嘅巴士車長報告咗呢一批電動巴士出現一系列缺陷：
- 車頂、輪胎罩漏水
- 自動門無法開關
- 空氣調節系統故障
- 行車期間有螺絲、蓋掩脫落
- 巴士自動駕駛系統會喺行駛途中突如其來「拋錨」，包括喺坡道上同埋十字路口，需要拖車救援
呢一啲缺陷可以話係「新車磨合期間」需要「執漏」嘅必經階段，對於大阪世界博覽會嘅參觀者嚟講只係「稍有不便」。然而EVMJ被日本公眾關注，起因係2025 年 4 月 28 號 1630 時左右，1架使用先進モビリティ株式会社自動駕駛技術、EVMJ提供嘅大阪世界博覽會自動駕駛電動穿梭巴士抵達舞洲巴士站落客之後，當巴士車長準備由自動駕駛模式轉換為手動駕駛模式嗰陣，電動巴士突然自己向前衝，以時速大約7公里撞埋前面嘅水泥壆。EVMJ表示係「外部設定自動駕駛系統失誤」所致，確認同電動巴士本身無關。
作為一間根本完全無生產過任何車輛嘅所謂巴士供應商，EVMJ為求「做咗嘢」就直接罔顧安全咁壓榨上游嘅中國巴士製造商，面對EVMJ嘅唔合理要求，中國製造商喺被逼履行合約之餘，對EVMJ提出過一啲質疑，甚至表明：
被EVMJ要求以極低預算、極短工期生產呢批巴士…
被EVMJ催促強行交貨就即係仲有好多細節尚未完成…
呢批巴士連廠方想做充分測試都做唔到…
所以請EVMJ唔好（喺做好測試前）直接交付畀客戶（巴士公司）。
對於EVMJ嚟講，由於首要任務係要喺申請補貼嘅截止日期前掟啲電動巴士出去，EVMJ直接無視呢啲質疑，繼續直接交付呢批電動巴士畀各間巴士公司。
2025年4月，EVMJ交付4架「V8 series1-Micro Bus 6.99米版本」電動校巴畀福岡縣築後市，仲拎嚟宣傳係日本首批電動校巴。不過就咁嘅，即使早喺正式投入營運前嘅測試階段，呢啲電動校巴已經頻頻發生故障。投入營運僅僅2個星期後，4架電動校巴全部停駛。經過維修，呢4架電動校巴去到2025年6月初恢復行駛，但僅僅1日後就再次出現自動門感應器故障而再次停駛。2025年10月1號，築後市當局取消咗同EVMJ簽定嘅合同，最終決定買柴油校巴取代由EVMJ提供嘅電動校巴。
學生家長得知成件事嘅經過之後，就搵嚟當地傳媒表達咗佢哋嘅擔憂，有關「EVMJ提供嘅電動巴士出問題」隨後喺日本全國流傳——但係EVMJ仍然公開堅稱「唔存在任何根本缺陷」。
2025年9月1號事故 掩蓋指控 欲蓋彌彰
EVMJ嘅危機喺2025年9月再創高峰。2025年9月1號，1架實際係由中國愛中和製造嘅EVMJ E1型小型巴士喺大阪市中心行駛嗰陣，發生轉向系統完全失靈嘅嚴重事故：
當時巴士自己向右行
即使巴士車長多次嘗試向左「扭軚」修正
巴士卻毫無反應
最終直接撞上馬路中間嘅分隔帶
為咗防止再有同類型嘅事故發生危害公眾安全，負責營運呢次出事電動小型巴士嘅「大阪市巴士」喺2025年9月2號立即終止使用旗下40架同型號嘅電動小型巴士。
EVMJ發表嘅內部調查結果立即引發日本公眾強烈憤慨：調查結論認為事故原因並非車輛缺陷，而係「巴士車長注意力唔集中」——
呢一個所謂嘅結論
比對返巴士車長嘅口供陳述以及車載攝影機嘅錄影
完全不符、極之矛盾
日本巴士業內人士隨後紛紛指控EVMJ係長期極有系統咁樣提交虛假報告：
EVMJ工程師拎着嘅內部檢查清單顯示「有缺陷」
但係提交畀客戶以及當局嘅報告就聲稱「一切正常」
對比EVMJ檢查員揸喺手已完成嘅檢查清單以及提交畀「大阪地下鉄」嘅檢查報告
差異顯而易見
好明顯EVMJ連國土交通省都呃埋…話啲巴士無問題
面對日本公眾以及輿論上面嘅質疑，EVMJ其後先至「私下」搵返涉事E1型小型巴士嘅營運商「大阪市巴士」嘅母公司「大阪地下鉄」解釋係「電子穩定控制系統（ESC）啟動，導致右前轆鎖死」，從而令巴士偏向右行。
政府介入 令人震驚嘅檢查結果
2025年9月5號，日本國土交通省下令對日本全國317架EVMJ交付嘅電動巴士進行全面檢查，其中包括大阪世界博覽會接駁巴士以及日本全國各地城市地區巴士營運商接收嘅電動巴士。 2025年9月9號開始，EVMJ派員北至北海道、南抵沖繩完成檢查。
2025年10月17號，時任日本國土交通大臣中野 洋昌公佈檢查結果：EVMJ交付咗嘅317架巴士中有113架有缺陷。好多巴士存在多項問題，有啲甚至有超過10項故障。其中1個關鍵問題係前轆組件附近嘅煞車軟管佈線不當，會同轉向部件接觸導致磨損，最終造成煞車故障。
2025年10月20號，日本國土交通省根據日本《道路運送車両法》嘅授權，突擊檢查EVMJ位於北九州嘅總部。呢次突擊檢查嘅起因係發現除咗最初嗰113架巴士之外，原來仲有其他車輛存在缺陷，尤其係EVMJ之前聲稱「所有故障都已經完全修復」嘅講法被證實係…
失實陳述
召回、停駛
2025年11月28號，EVMJ向日本國土交通省提交「召回申請」，涉及190架電動巴士。呢啲電動巴士涵蓋晒3間EVMJ要求代工嘅中國生産商、已經分發畀日本各地嘅巴士營運商。呢190架電動巴士其中數量最多嘅係「F8 series4-Mini Bus 6.99米版本」電動小巴，涉及85架。日本國土交通省表示，呢批電動巴士出現「結構缺陷」，導致煞車零件磨損，降低煞車力道——
嚴重違反日本國家安全標準
2025年12月23號，「大阪地下鉄」宣布「為保障乘客安全」，立即暫停營運旗下「大阪市巴士」所有由EVMJ供應嘅電動巴士，當中涉及75架電動小型巴士以及115架電動大型巴士。呢批仍然保留着2025年大阪世界博覽會標誌嘅紅、白、藍三色塗裝嘅電動巴士已經由原本行駛緊嘅巴士路線撤走並存放喺巴士廠。
目前，「大阪市巴士」嘅呢一堆電動巴士停放喺大阪府泉大津市，成排停放嘅電動巴士已經成為呢次EVMJ醜聞嘅標誌，被日本民間以及傳媒廣泛稱為「電動巴士墳場」。
社長辭職、領導層「重組」？
2026年2月20號，EVMJ發表正式聲明，承認EVMJ持續存在安全風險、管理缺陷。創辦人兼社長佐藤裕之喺2026年2月28號卸任社長一職，但仍然留喺EVMJ擔任技術顧問，副社長角英信由2026年3月1號接任代理社長。
EVMJ表示，所有由EVMJ交付嘅電動巴士已經喺2026年1月底前完成檢查以及維修工作，並且概述咗一系列糾正措施，包括品質管理改革以及推進日本國內生產嘅計劃。不過EVMJ恢復正常運作嘅時間表仍未明朗。
對於佐藤辭去社長一職，員工難免對佐藤嘅所謂辭職表示擔憂：「雖然佐藤表示卸任，但仍然以『技術顧問』身份留喺公司。佢可能唔認為自己應該為忽視技術故障問題負責。有人認為佢打算低調行事一排，等待公眾輿論平靜返之後再重返社長職位。」
深層次問題：誠信何在？
EVMJ嘅電動巴士醜聞引發一系列更深層問題。其中一個核心問題係
呢啲巴士被廣泛認為
有時甚至被刻意宣傳
係「日本國產電動車」
但實際上完全係中國製造
前・日本経済産業大臣西村 康稔喺2025年4月表示，EVMJ曾經向日本政府官員表示EVMJ所提供嘅呢啲電動巴士…
絕非中國製造
（EVMJ明顯對日本政府作出咗虛假陳述）
呢次EVMJ賣電動巴士醜聞事件引發咗日本國內關於電動車產業供應鏈透明度、日本進口巴士以至其他車輛嘅安全認證流程係唔係完善，以及隨着車輛越嚟越多電子裝置引伸出遠端連網車輛系統會唔會「構成國家安全風險」嘅討論。
日本巴士業界就話呢一刻唔好妄下結論，因為世界趨向發展「全球化供應鏈」，呢次EVMJ賣電動巴士醜聞事件根本唔係單純涉及電動巴士嘅生產地，更加係涉及設計、裝嵌、品質保證、客戶管理等各個環節責任劃分，點樣確保遵諾守信、致力盡責，整個日本社會都要反省當中嘅疏忽，而…
唔係盲目咁只係指向「中國製造」呢4個字就可以當「解釋晒所有嘢」
日本巴士業界表示，EVMJ賣電動巴士醜聞就係案例，一旦有任何環節出現問題，後果可能由簡單咁喺世界博覽會展示國家嘅缺失演變成為複雜嘅國家安全危機。
Be the first to comment