最近的「環保餐具」問題，可謂人人喊打，但對於旅遊巴司機嚟講，唔止係靠害咁少事。到底有幾大問題，首先要由無位泊嘅情況開始講起。
咁多類商業車輛入面，旅遊巴絕對係飽受歧視同遭到忽視嘅一種，因為唔好話合法泊位數量係所有車輛種類最少的，就連想搵個唔點阻到人/車嘅罅隙然後「錶板擺低三百二行咗去」都因為車輛體積巨大而難度極高，所以「堂食」對於旅遊巴司機嚟講，唔止係痴心妄想，直情係「發夢都唔駛諗」。就算好好彩搵到合法嘅錶位，唔好意思，絕大部份都係「半個鐘錶」。
就算用 HKeMeter 入錶，頂到盡只係得一個鐘。而講緊啲食肆唔會响正個錶位嘅側邊….. 就算有錶你估真係有得去「堂食」呀?!
延伸出嚟，買外賣返上車食，就係旅遊巴司機之絕對必然。因此，所謂環保政策之走塑，對旅遊巴司機絕對係最大的(無「之一」) 受害者。再甚至宏觀去理解，根本好難唔對住謝展寰同一眾環保份子直接爆粗問候佢哋娘親。
首先，承如上段提及的政策規劃，旅遊巴司機基本上真係絕對唔駛旨意响開工期間可以進入食肆舒舒服服食返一餐，或者話能夠泊低架車去「堂食」，基本上係難過中六合彩。事實上，呢個規劃問題積累咗超過二十年，講緊由小弟未攞到9,10號牌而同呢個行業有緊密接觸以來已經知道，到考到牌之後當然親身經歷。
本來，旅遊巴上也許會有一個儲物櫃或「電箱」，繼而有一個大約2呎闊1呎深嘅「枱面」，司機可以坐响其後嘅座椅，算係無得堂食但又算可以舒舒服服坐住响度填飽個肚。
可是，响2009年5月1日，運輸署對旅遊巴乘客座椅實施新規例，美其名「保障乘客安全」，表面上說是援引歐盟 ECE-R80 安全標準，實際上根本係發揮佢哋非常厲害嘅僭建規則能力，為業界包括車公司、車身廠、代理添煩添亂。是故之我稱之為「香港特色的ECE-R80標準」。其中一樣所謂安全設備就是一個猶如只有櫈背的「安全防撞護欄」。
即使車身廠仍然會裝有儲物櫃，相信睇上面張圖都應該睇得到，司機根本無可能坐响度食飯。
正所謂已經俾運輸署啲「僭建」搞到連食外賣都食得唔安樂 ── 一係企响度食、一係就如踎响街邊捧住個盒/兜得返一隻手揸餐具嚟食。試問今鋪謝局長同啲環保份子全力催銷嘅環保餐具，好話唔好聽，支叉想拮塊唔好話豬扒，連件魚柳、餐肉都搞唔掂；仲有支匙羹，唔止舀飯都成困難，朝早做完廠/學仔，搵到個位叫個外賣早餐火腿通粉，分分鐘支羹都溶埋，仲唔係想餓X死旅遊巴佬呢？
綜合晒所有情況，請問除咗向謝展圜同一眾催銷所謂環保主張嘅環保撚直接爆粗D9佢哋老母之外，作為一個旅遊巴司機對住啲「環保餐具」還可以作出乜嘢嘅反應？
Be the first to comment