【蘇格蘭】鴨巴甸終止氫能雙層巴士計劃後將出售車隊及設施

蘇格蘭鴨巴甸市議會之前同BP（即係以前叫「英國石油公司」嗰間公司）合資計劃已經喺2026年初正式宣告結束，鴨巴甸市議會正準備出售市內25架已經停駛1年幾嘅氫能雙層巴士。

呢批由Wrightbus公司製造嘅60座Streetdeck Hydroliner型氫能巴士喺2021年初投入營運，當時並被譽為「全球首創」嘅氫能雙層巴士車隊，主要由First Bus公司營運。

由於位於鴨巴甸Kittybrewster以及Cove嘅2個加氫站多次維修延誤，導致呢批氫能雙層巴士自2024年底以嚟都一直無法加氫而要停駛。目前所有氫能雙層巴士仍然停泊喺在First Bus公司位於King Street嘅巴士廠。

據報鴨巴甸整個氫能雙層巴士項目耗資大約830萬英鎊，由鴨巴甸市議會、蘇格蘭政府、歐盟共同出資，其中每架巴士嘅投資額約為50萬英鎊，而呢啲氫能雙層巴士拉匀每一行車公里可以減少一公斤二氧化碳排放，而且大幅降低噪音。

合資企業退出及基礎建設轉移

鴨巴甸市議會表示退出BP嘅合資計劃，原計劃喺哈內斯路（Harness Road）一處廢棄垃圾堆填區生產氫氣；鴨巴甸當局表示正在就合資企業嘅轉讓事宜進行談判，並且已經同意採取措施加強電動車充電基礎設施。

鴨巴甸市議會指出，電動車技術大幅進步以及交通運輸領域現時對氫氣需求不足係重新評估氫能樞紐計劃嘅主要原因：

「由於電動車技術顯著進步，鴨巴甸市議會同BP一直就氫能樞紐嘅未來可行性進行持續諮詢。隨着製造商以及營運商越嚟越傾向用電動車，交通運輸領域對氫嘅需求有所下降。鑑於呢啲發展，雙方正在重新評估戰略方向，以適應不斷變化嘅市場格局。」

現時鴨巴甸市議會已經準備為呢25架氫能雙層巴士、加氫設施，以至同BP嘅合作計劃尋求買家，雖然以官式投資運作嘅氫能雙層巴士計劃唔可行，但鴨巴甸現有整套方案嘅市場估值已經超過1000萬英鎊。