同香港相隔8個鐘頭時差之處，一個曾經銳志要成全球首支氫能雙層巴士車隊嘅計劃，喺2026年初正式宣告結束。
呢項耗資幾百萬英鎊、位於蘇格蘭鴨巴甸嘅計劃涉及25架氫能雙層巴士，原本旨在引領低排放公共交通嘅未來，並且計劃將蘇格蘭鴨巴甸建造成為全球氫能巴士中心。
不過呢啲曾經被認為係時代尖端嘅氫能巴士已經被棄用，同時曾經號稱會創造700個工作機會嘅宏偉目標亦隨之破滅。
當地時間2026年2月26號傍晚，鴨巴甸市議會宣布喺緊急事務委員會會議後，決定放棄氫能雙層巴士車隊，轉而使用電動巴士。
鴨巴甸市議會喺2022年搵咗石油天然氣巨頭BP（即係以前叫「英國石油公司」嗰間公司）達成合作，共同推動鴨巴甸嘅氫能發展計劃。但係由於一系列技術問題，氫能巴士車隊最終輸咗畀快速發展嘅電動巴士技術。
由於位於鴨巴甸Kittybrewster以及Cove兩地嘅加氫站故障，氫能巴士自從2024年9月開始已經停止營運。鴨巴甸市議會表示，由於電動巴士技術顯著進步，佢哋一直有同BP就鴨巴甸未來有無可能作為氫能巴士中心進行「持續諮詢」。
鴨巴甸市議會嘅一份聲明指出「隨着製造商以及營運商越嚟越傾向用電動車，交通運輸領域對氫能嘅需求有所下降。鑑於呢個發展，雙方正在重新評估戰略方向，以適應不斷變化嘅市場情況。」
鴨巴甸市議會嚟緊會同BP就合資企業嘅轉讓事宜進行談判，並且朝着全面過渡到電動巴士嘅方向邁進。鴨巴甸市議會已經徵詢咗呢個項目嘅總成本，據悉達到幾千萬英鎊。BP表示會同鴨巴甸市議會密切合作，共同推動「後續步驟」。當地巴士營運商First Bus表示，佢哋仍然就車隊未來發展方向進行討論。
轉用電動巴士
多年嚟，隨着越嚟越多城市選擇電池驅動巴士嘅替代方案，氫燃料電池巴士嘅命運似乎註定「時不與佢」。
電動巴士電池容量以及效率近年大幅提升，配合充電速度加快，意味着電動巴士可以喺短時間充電而行駛長距離。
2021年，格拉斯哥First Bus公司確認投資建設一支由120架單層以及雙層電動巴士組成嘅車隊，呢啲電動巴士可以喺夜間快速充電，然後行駛18個鐘。最近，穿梭蘇格蘭各大城市之間嘅城際巴士營運商Ember，旗下電動巴士車隊規模已經增加到98架。
雖然電動巴士嘅售價高於同等運力嘅油渣巴士，但電動巴士營運成本非常低就令營運商慳得到幾百萬英鎊。
相比之下，氫氣依家嘅生產成本就仍然偏高——英國現時使用電解過程生產氫氣需要消耗大量綠色電力。就算氫氣嘅優點在於氫能巴士可以喺幾分鐘內完成加氫，而唔係幾句鐘，但英國人現時認為呢種高昂成本唔值得。
蘇格蘭保守黨地方黨團領袖理察 布魯克（Richard Brooks）議員表示，氫能雙層巴士車隊計劃嘅資金已經被「浪費」，相關人士需要出嚟解釋。理察 布魯克議員表示：「呢啲唔係啲乜嘢高深莫測嘅科學理論，大家都睇得出遲早出問題，令人失望嘅係政府反應太慢。我認為政府應該企出來向公眾道歉——佢哋落錯注…老老實實唔好匿埋。」
Be the first to comment