城巴屯門和田菁田拓版圖 九巴「拆線」迎戰

背景

隨著運輸署喺2021年8月3號公佈揀選城巴營運屯門54區嘅6條巴士路線，城巴正式為屯門新嘅54區推出全新以及全面嘅巴士網絡——其中2022年7月17號率先開辦嘅50M號路線會提供連接屯門54區以及屯門站嘅區內巴士服務。而2022年7月18號開辦嘅50、55、56號路線就分別提供直接往來屯門54區以及尖沙咀、觀塘、上水嘅特快服務。早前一同中標嘅另外2條往來屯門54區以及港島全新過海路線亦預期喺2022年內稍後時間開辦。城巴計劃2022年內因應顧客需求，將屯門54區內部分原本只係上、下晝繁忙時間路線改做全日服務，為屯門的顧客帶來新嘅公共交通選擇。

城巴營運總裁李卓豪先生早前表示：「我哋好高興推出6條新路線，為屯門嘅顧客提供直接以及特快嘅巴士服務。城巴962系列過海路線已經服務屯門超過20年，依家終於能夠為顧客提供連接屯門、九龍以及新界嘅全面巴士網絡。隨著愈嚟愈多屋苑入伙，我哋絕對有信心喺（2022）年底前將部分路線提升做全日服務，並且希望城巴網絡成為大眾嘅首選。」

城巴表示會優先用達到歐盟6型環保排放標準嘅新巴士行走呢批新路線，配備全車座椅安全帶、電子穩定控制系統、車速限制減速控制裝置以及等離子空氣清新機，並且會同多條城巴以及新巴路線喺屯門公路巴士轉乘站以及九龍區設有超過190項八達通轉乘優惠，提供更便捷、多元化嘅公共交通選擇畀居民。

如果唔講行車紀錄員鬧事呢單嘢

而集中講返城巴開新線嘅話…

為咗宣揚提供全新嘅屯門54區巴士路線，城巴喺2022年7月17號已經安排咗多架啱啱喺2022年7月先至「出牌」嘅全新12米版本Enviro500 MMC型雙層巴士，披上相關嘅車身宣傳廣告：

8558 / YB8284（港九新界←→屯門）

8561 / YC350（和田 菁田←→屯門站：50M號路線）

50M號路線（屯門54區←→屯門站）穿梭屯門區內，提供往來和田邨、菁田邨以及屯門站嘅循環線服務，途經：

• 兆康苑
• 屯門醫院
• 建生邨
• 良景邨
• 田景邨
• 山景邨

由和田邨開出嘅班次服務時間為每日0600時到2330時。全程車費為港幣4.9元，設有分段收費。

8560 / YB8846（油尖旺←→屯門：50號路線）

50號路線（屯門54區←→尖沙咀 九龍站）經屯門公路以及西九龍走廊快速連接屯門54區以及西九龍鬧市，途經：

• 菁田邨
• 和田邨
• 欣田邨
• 兆康苑
• 紅橋
• 屯門公路巴士轉乘站
• 旺角
• 油麻地
• 佐敦
• 尖沙咀

由菁田邨開出嘅班次服務時間為星期一至五（公眾假期除外）0735時以及0755時；由尖沙咀（九龍站）開出嘅班次服務時間為星期一至五（公眾假期除外）1800時以及1820時。全程車費為港幣16.2元，設有分段收費。

8562 / YB9341（九龍東←→屯門：55號路線）

55號路線線（屯門54區←→觀塘碼頭）經屯門公路以及長青隧道快速連接屯門54區以及東九龍鬧市，途經：

• 菁田邨
• 和田邨
• 欣田邨
• 兆康苑
• 紅橋
• 屯門公路巴士轉乘站
• 黃大仙
• 九龍灣商貿區
• 觀塘商貿區

由菁田邨開出嘅班次服務時間為星期一至五（公眾假期除外）0720時；由觀塘碼頭開出嘅班次服務時間為星期一至五（公眾假期除外）1800時。全程車費為港幣17.9元，設有分段收費。

8563 / YB8576（北區←→屯門：56號路線）

56號路線（屯門54區←→上水 天平）經元朗公路、新田公路以及粉嶺公路快速連接屯門54區以及新界北區，途經：

• 菁田邨
• 和田邨
• 欣田邨
• 兆康苑
• 上水站
• 上水廣場
• 上水（天平邨）

由菁田邨開出嘅班次服務時間為星期一至五（公眾假期除外）0700時；由上水（天平邨）開出嘅班次服務時間為星期一至五（公眾假期除外）1800時。全程車費為港幣14.6元，設有分段收費。

電子路線顯示牌

除咗車身廣告之外，城巴亦都喺相關路線巴士嘅電子路線顯示牌加插宣傳語句：

多條城巴路線

連接和田菁田

屯門←→港九新界

首選搭城巴

首日

2022年7月17號50M號路線首航嘅日子，城巴派出多名員工去到和田邨巴士總站向途經嘅市民派發宣傳單張。

高層管理人員亦去到和田邨巴士總站，當中包括匯達交通嘅行政總裁譚利民（Adam Leishman）、營運總裁李卓豪（Richard Hall）。

下晝1點15分左右，佢哋仲接見咗香港立法會（新界西北）議員周浩鼎，期間周浩鼎議員向匯達交通兩位總裁表達當區嚟緊將會有新嘅屋苑入伙、新嘅商業中心亦會落成啟用，相信城巴呢啲新嘅路線會有良好嘅客量。

城巴嘅多名代表仲同周浩鼎議員一齊登上其中一架巴士（8561 / YC350）試搭一下，體驗新路線會途經嘅地區，亦喺和田邨總站同一眾在場嘅城巴代表合照。

城巴亦帶咗一啲宣傳道具去和田邨巴士總站，畀路過嘅市民可以「打卡」留念。

隨著接見完周浩鼎議員，譚利民乘搭專車離開，而李卓豪就乘搭1400時開出嘅50M號路線巴士，城巴整個宣傳活動大約喺下晝2點幾結束。

九巴

另一方面，為咗配合屯門54區未來人口增長，運輸署喺《2019-2020年度巴士路線計劃》中建議九巴67M號路線（屯門（兆康苑）←→葵芳站）增派8架巴士，以開辦全日分支：九巴67A號路線（屯門（寶田邨）←→葵芳（葵翠邨）），走線同原有嘅九巴67M號路線相約，但喺青麟路之後繼續車程，途經菁田邨、和田邨，以屯門（寶田邨）做總站——但喺青麟路同埋屯興路之間就只停靠部份巴士站。

九巴67A號路線喺2022年7月17號首航，九巴為咗宣傳呢一條新嘅分支路線，喺呢條路線嘅部分巴士車身上面亦都貼上咗宣傳廣告，向乘客表示可以由和田邨、菁田邨上巴士搭去屯門公路轉車站，再轉搭其他九巴路線——尤其係使用「九巴月票」乘搭960 / 961 / P960前往港島區。

而且九巴亦都善用佢哋嘅電子路線顯示牌加插宣傳語句：

全日→轉車站

多線任選擇

咁究竟乘客會選擇買張「九巴月票」走去搭九巴67A號路線喺屯門公路轉車站轉車，定係等到城巴真係升級搞直達港島、九龍鬧市嘅全日路線呢？九巴同城巴喺呢度究竟會係各取所需定係掀起一場新嘅混戰呢？相信一兩個星期內係唔會咁快見到結果嘅…不過…

最開心嘅係興貴街、欣寶路附近嘅村民：

終於喺屋企門口附近有得搭公共巴士喇！

（村民真實對白）