Alton Bus Rally 2024 之 前城巴 Leyland Olympian #152

除咗前一篇嘅退役九巴 MCW Metrobus 11m 之外，今次嘅 Alton Bus Rally 2024 尚有另一部來自香港嘅退役巴士，就是前城巴的 Leyland Olympian，車隊編號152。

如果大家有印象的話，應該記得呢部 Leyland Olympian 幾年前曾參與過一宗可謂同香港直接有關嘅任務，所指嘅係响2022年播出由英國嘅製作公司 The Left Pictures 夥拍 Sony Pictures Television Studios 拍攝並於 Netflix 播放嘅劇集《The Crown》第五季，第十集劇情講述1997年大選貝利雅領導工黨大勝上台之後就到香港主權移交，其中有模擬於香港嘅場景，有一部城巴出沒「過鏡」

而响2021年12月底劇集拍攝呢場戲嘅時候，英國《每日郵報》圖文並茂報導製作花絮，並拍得呢部「城巴」嘅全貌，清晰可見車頭頂端的車隊編號 152。不錯的，就是本文提及嘅主角。

誠然「152」早就落腳英倫，因而出現於 Alton Bus Rally 帶來嘅驚喜或稍遜於 S3M249 ，但出現於《The Crown》加諸於此車車主 Dave Rogers 因同時擁有多部退役香港巴士而稱他為「香港巴士保育教父」，其蘊藏著嘅故事也值得細味。

事實上，翻查資料，呢部1990年响香港出牌嘅退役城巴，以「歷劫生死」形容並不為過。因為响2003年「沙士」之後，當時城巴嘅大股東 Stagecoach 見客量暴跌，將為數四十多部同型號巴士轉售至當年於英國剛開業、同集團旗下嘅長途巴士公司 Megabus。但「152」運抵英國之後並未有披上 Megabus 塗裝征戰英國南北。

新尚線出版總編輯龔嘉豪估計 Stagecoach 可能原計劃 152 為「器官捐贈車」，即用作拆件予其他嘅「同門兄弟」續命之用，猶幸最終未有被肢解，及後就由 Dave Rogers 買入收藏。

後來 Mr Rogers 基於私人原因將之出售。及後「新車主」於2014年再度放售，而 Mr Rogers 於2016年「回購」呢部愛駒，期間進行咗包括除去原有的車身廣告等翻新工序，並一直保留至今。成為《The Crown》嘅佈景之一，亦出席於今次嘅集會活動。相對於 「178」大食鬼只能由拖車牽引到各處展覽，「152」可自由活動，參與戲劇製作、甚至載客，有些事情可能需要深思一吓吧。

相片除註明外，鳴謝 Brian Wong 及富蝶邨業主關愛協會主席提供及授權。