之前都同大家介紹過 Apex Mini，同埋 Moonca 兩款純電動小巴。兩款電動專線小巴雖然仍然未投入服務，但係各自嘅外觀、車廂設計，以及座位編排、電池續航等等，都將香港嘅專線小巴帶入一個全新嘅領域。
但係要講到近期討論性最高嘅電動小巴就一定係呢一部「金路通」，只係喺我哋六月時張貼有關呢部小巴前往青衣驗車嘅貼文，就已經有成四萬人喺網上面瀏覽過。不過呢部車能夠引起各位香港人討論嘅，並唔係佢有任何特別嘅續航里程或者規格，而係佢獨特嘅外型。甚至有巴士迷取笑佢，幫佢起「箭豬」呢個花名。近日呢部車已經完成咗運輸署嘅車型檢定（Type Approval），並且喺8月25號舉行咗傳媒同埋業界發佈會。就等巴士台帶大家睇吓呢部車除咗外型獨特之外，仲有啲乜嘢其他特色！
當筆者一進入位於錦田嘅「金路網」充電站，就已經見到停泊喺場中間嘅「金路通」電動小巴。同之前第一次驗車時最大嘅唔同，就係廠方已經將車頂，被網民恥笑為「箭豬皮」嘅太陽能車頂旁板移除，改為一幅弧形嘅玻璃纖維外殼取代。喺外觀上的確係比原本順眼咗少少，但係車頭嘅貨車車門造形，仍然令人錯覺佢係使用貨車改裝成為小巴。
為咗釋除呢個疑問，筆者專程向廠方了解到底呢部車係唔係用貨車改裝而成。廠方人員就帶筆者去到電動小巴嘅旁邊，並且介紹喺旁邊展示嘅第二代金路通小巴底盤。由底盤嘅高度、底盤主陣同避震懸掛配置，車尾嘅 Dana 車軸，以及車尾預留用作安裝摩打嘅位置都可以睇到，採用嘅底盤係一部中型巴士嘅車陣，而廠方只係將頭尾軸之間嘅車陣佢割開，並且製成低地台區域，成為一部低地台電動小巴。而走上「金路通」小巴上，駕駛室嘅所有錶版、按鈕，以及其他電控屏幕，都係廠方全新設計。但係因為設計車身時，借用貨車車門作為A柱及B柱之間嘅門板以及駕駛室車門以減低成本，所以令人誤會佢係由貨車改裝，而事實「金路通」卻係一部完完全全由香港設計同生產嘅純電動低地台小巴。
雖然「金路通」小巴嘅外型，未必人人都能夠咁快消化得到，但係佢嘅車廂設計，係就住業界嘅需要，同埋乘客出發。駕駛室錶板嘅按鈕排佈喺前面同左邊包圍司機，全部觸手可及。為咗方便快速開門上落客，廠方聽從小巴營辦商意見，棄用現時新式嘅電動車門，改用舊式小巴常見嘅嘅拉杆式手動摺門。而對乘客而言，炎炎夏日一定要有涼浸浸嘅車廂，先至係一個舒適嘅乘車環境。金路通小巴就喺車頂設有三部冷氣，車頭一部24V冷氣機專為司機提供冷風，車頂左右各有一部220V冷氣，分別送風到車廂兩邊嘅冷氣風槽。每排座位嘅出風口上，廠邊亦貼心為乘客加設一個「神秘按鈕」，㩒落去之後，風口後面嘅風扇亦會隨即開著，加大冷氣出風量。今日酷熱天氣下，筆者覺得呢個設計簡直係一絕！
此外，車廂前方以及司機位亦設有顯示屏，顯示車上空位，並以紅、綠色表示已被佔用座位及乘客有否扣上安全帶。車廂佈設有法定上限嘅19個座位，低地台區上有10個座位，以2+1方式排佈，而另外9張座位就設喺一級高嘅凳腳地台上。尾排四張座椅緊貼車尾背板，但中間兩個座位頭部空間就被電控組件散熱風扇部件所佔據，如果身高 185cm 以上嘅乘客，就會有撞頭嘅情況出現。不過身高唔夠 170cm 嘅 Jacky Lim 坐落去，就當然無問題啦！
金路通小巴採用雙電池設計，續行里程約 80 公里。為配合運輸署嘅電動小巴先計劃要求，除咗歐盟標準以及中国標準兩款充電插頭外，亦都可以使用集電弓進行快充，只要 20 分鐘充可以充滿九成電量。雖然帳面續航里程只有 80 公里，但係對於需要行行停停，而且路程唔遠嘅專線小巴而言，每轉車只需要返回總站，利用快速充電都足以應付日常車程使用。電池同電控組件安放喺尾軸後嘅車底，而散熱系統就擺放喺車尾上方，令車廂同低地台得以善用。廠方指買家仲可以選擇四電池、或者六電池版本，續航距離最長可以達到 200 公里。
而廠方提供嘅售後服務亦都相當全面。除咗喺有需要時可以出動「流動奶媽」－流動充電車為車輛提供緊急充電外，亦都可以為買家提供小巴嘅實時大數據－「金路雲」服務。只需要登入系統，就可以即時查閱旗下金路通小巴嘅實時位置、剩餘電量，甚至車上乘客數目，以及實時車上閉路電視影像，都可以睇到。
總括嚟講，金路通小巴的確係一部顧及司機同乘客需要而設計嘅電動低地台小巴，除咗19座小巴版本外，廠方仲有設有電動斜板，可以安放多部輪椅嘅復康巴士版本，以及可以編排27個座位嘅中型巴士版本。但係最後，都不得不再次提及佢嘅外型設計同裝嵌手工，真係仍然有好大嘅進步空間。希望喺嚟緊 2024 年量產嘅下一代版本，可以嚟得更加順眼，同更易令人接受啦～
編按︰被大家取笑而最後被卸裝嘅「箭豬皮」嘅太陽能光伏板，原本可以喺陽光充足日子下，每小時為電池充 1kWh 電。根據使用經驗，可供巴士靜止時提供約兩個幾鐘頭嘅車廂照明同冷氣。
Be the first to comment