富豪 B8R 台灣「大吉汽車」車身旅遊巴士 TILT-TEST 通過 台灣車身再闖香港市場

台灣建造車身嘅旅遊巴曾經响廿幾三十年前係香港市場嘅主流，但近十幾年就變得罕見。而一向勇於創新嘅 JOJOBUS 透過同集團旗下公司响去年年底引入一部由台灣「大吉汽車」裝嵌車身嘅 Volvo B8R 旅遊巴士，引起咗業界及巴士迷圈子一陣躁動，其中一個因素就係源於呢段歷史。

呢部也許簡稱為「大吉富豪」嘅樣板車响去年11月運抵香港之後久未正式露面，期間當然係進行各種測試與及辦理程序繁複嘅運輸署 Type approval 申請手續。經歷過萬千勞苦，今日就進行 Type approval 嘅最後程序 ─ 傾側測試。

採用 Volvo B8R 底盤，配備氣墊式懸掛，傾側測試當然無難度，一 take 過順利完成。

呢架車身來自台灣嘅旅遊巴，我哋認為不論 JOJOBUS 或「大吉汽車」相當大膽，一來因為我哋所掌握到本港業界對台灣車身嘅意見，二來就如之前一集「Volvo 富豪 B8R 捷聯JL-020 車身 11.6m 旅遊巴士」影片當中提及台灣巴士車身嘅技術問題，認為台灣車身廠要「勇闖」香港市場絕非易事。

首先，有經常去台灣旅遊又有留意當地嘅長途巴士 / 旅遊巴士，必定留意到車身設計可謂「萬變不離其中」…….

唔理乜嘢牌子底盤，唔理邊間車身廠，總之就係要咁嘅外型 LOOK

說穿了其實係1980年代 Neoplan Cityliner 嘅造型。據熟悉台灣嘅 Uncle Lim 從當地業界了解，原來「唔係呢個樣就幾乎無人要」。

正所謂「又不是八十年代」，莫講話去唱K都可能嫌老土啦…… 而「大吉」今次為香港市場設計就徹底放棄「中華民國美學」，算得上有誠意。

第二，响嗰一集節目入面有提到台灣車身「相當重秤」。即使擱開本港法例限制，整車重量高對於旅遊巴經營者絕非好事。而呢部「大吉富豪」就做咗唔少「減磅功夫」，例如拆去「充滿台灣風情」予旅客沿途載歌載舞嘅40吋 (甚至更大) 大電視 + 最少4部19吋顯示屏幕、實木箱 6×9、6×10 甚至 8×13「高級音響喇叭」換回「夠用的正常SIZE」嘅5吋喇叭

仲有因為放棄「台灣指定車身造型」，簡化咗車身骨架結構，全車淨重由台灣當地款式嘅接近14噸降至大約12.8噸。雖然相比本港車身廠出品仍然重咗一啲，但起碼可見「大吉」為香港市場確係下過苦功。

Tilt test 過咗就有待運輸署完成餘下嘅行政程序，相信JOJOBUS就會好快將呢部「大吉富豪」正式出牌，到時大家就可以用 JOJOBUS 手機應用程式 (iPhone 版本) 租車去遊車河，感受吓呢部「台灣出品」嘅表現。至於我哋會唔會做 Test drive 再深入啲介紹，bookmark 住我哋網站、Facebook 專頁同訂閱 YouTube 頻道就會知道。

特別鳴謝：
JOJOBUS
港巴集團有限公司