英格蘭足球超級聯賽（英超，Premier League）係英格蘭頂級足球聯賽，1992年創立，2022~2023年係第 31 屆，20支球隊會各會互相對賽38場，其中「曼徹斯特城」球會（曼城，Manchester City Football Club）以28勝5和5負89分奪冠，晉身2023~2024歐洲冠軍聯賽（歐聯，UEFA Champions League）分組賽。
除咗係「英超」冠軍之外，曼城喺2022~2023年球季仲奪得英格蘭足總盃（Football Association Challenge Cup）以及「歐聯」嘅冠軍，除咗係球隊歷史上首次奪得「歐聯」冠軍之外，仲成爲英格蘭足球史上第2隊「歐洲三冠王」。
之前巴士台都有報道過，以26勝6和6負84分攞到2022~2023年「英超」第2名嘅「阿仙奴」球會（兵工廠，Arsenal Football Club），香港有球迷就喺2023年6月3號下晝租開篷巴士巡遊。
嗱，是咁的，即係咁講，如果拎第2名就已經要搞巡遊，拎冠軍嘅搞巡遊就更加合理啦！大家話係唔係呀？
如是者，「曼城香港球迷會」（MCFC Supporters Club HK）就喺2023年6月15號搞咗一次巡遊…不過呢次就唔係開篷巴士，而係派對電車…
不過呢，就咁嘅，可能唔少人唔知，近來派對電車好旺場，所以今次「曼城」奪冠嘅巡遊活動都要等到上一團完咗先至得…相關嘅#28電車喺當晚9點幾做完上一團返到去屈地街電車廠。
「曼城香港球迷會」嘅會員隨即喺屈地街電車廠上到去#28電車，掛上多幅橫額，畀人知道係「曼城」贏到冠軍嘅巡遊。
巡遊喺當晚9點半開始，由屈地街電車廠沿著電車軌向東行，第一個中途站係10點20分嘅銅鑼灣電車總站，參加者都好興奮拎起「曼城」嘅旗同埋道具「獎盃」打卡。
至於第二站就係10點45分嘅跑馬地電車總站，雖然夜深，但都有球迷影相「打卡」。而其實喺車廂入面，巡遊期間一直都係各位參加者飲著酒、唱著歌，再同周圍嘅途人揮手歡呼，喺回程仲有抽獎㖭！參加者都感到盡興而歸！
呢次巡遊嘅派對電車喺夜晚11點半返到屈地街電車廠，巡遊行程以此完結，亦不得不提當晚天公都盡力造美，暴雨係喺巡遊完結咗先至降臨港島，或者上天都唔想掃「曼城」球迷嘅興？
（承蒙香港電車協助，謹此感謝。）
Be the first to comment