由勝利二型講起英國巴士工業沒落又唔怪得晒戴卓爾夫人

上月尾响恒生大學舉辦勝利二型嘅展覽，的確引起好多討論，除咗退役巴士保育之外，其實仲有延伸到英國嘅汽車工業沒落 (較集中於「線下」)，呢個好似九唔搭巴嘅角度。但又咁講，如果睇返勝利二型嘅出現，完全係因為香港嘅要求，加諸於要求嘅過程，某程度上都反映經過工黨整頓成為英國商用車製商龍頭嘅 Leyland，踢都未必好肯郁。

Leyland 响1988年被 Volvo 收購，與及 MCW 响1989年倒下，剩下 Dennis 亦捱到廿一世紀重整又重整之後被加拿大NFI 收購，再連同埋 Optare 被印度 Ashok Leyland 收歸旗下，唔計 Wright 呢間神棍公司，英國巴士工業可謂已經 Total lost。

英國巴士工業徹底瓜柴，除咗要怪責希思至戴卓爾夫人之外，其實响純粹技術層面，都幾肯定算係啲車廠咎由自取，尤其是早陣子响網上睇到 1974年西德平治推出嘅 O303 巴士底盤 Catalogue，真係反映英國嘅巴士工業既守舊又不思進取。

從擷取嘅 O303 巴士底盤 Catalogue 內頁可以睇到，歐洲大陸，尤其是西德，已經著力於後置引擎、Monocoque 或 semi-integral 有行李倉佈局、氣墊懸掛嘅 R&D，以至應用。甚至再細心啲睇，O303 底盤仲可以話奠定咗今時今日「斬陣」嘅技術原形基礎。

但响嗰個時空，英國佬仍然堅定不移地認定呢啲設計必定唔掂，堅持巴士只可以前置或中置引擎，車身只可以有如貨車咁「晾」响陣架之上，葉片彈簧可靠耐用維修成本低 bla bla bla。

的確，例如 GUY Wulfrunian 嘅失敗、Daimler Fleetline / Leyland Atlantean 嘅問題天天都多，係會令到英國嘅巴士製造商對於「氣擔」、後置引擎佈局等一堆先天問題望而生畏。但回顧返直到「通通執笠」前夕嘅歷史，英國佬對於呢啲問題嘅選擇似乎係唔解去決問題，或是再加上 Leyland Panther / National、AEC Swift、Seddon RU 等等車款嘅後繼無為，反映英國嘅車廠嘅知識同應用概念嘅落後，因而根本唔知點樣搵方法去解決問題。

唔計 Kässbohrer、Neoplan 呢啲响嗰個年頭嚟講係「超時代科技」，單係 Benz 呢條 O303 底盤，通通將英國佬認為唔得、唔會有解決方法嘅嘢，算係叫做搞掂晒。結果，當歐洲經濟委員會要求英國開放市場，形同為英國巴士製造工業倒冧揭開序幕。

無錯，MCW 推出 Metroliner、Duple 推出 300 系列、Caribbean 迎戰，及後 Leyland 亦終於發現將 Leopard 少修少改推出中置引擎嘅 Tiger 「唔夠打」卒之死死氣推出「堅定認為技術唔可行」的後置引擎及氣墊縣掛嘅 Royal Tiger 試圖力挽狂瀾，但比起歐洲大陸嘅出品，可能就係遲咗十幾年起步，質素連英國嘅客運公司、旅遊公司都唾棄，就成為 Leyland 以至英國整個巴士製造業倒下嘅最後一根稻草。

不過咁，講咗呢堆純技術嘅嘢並唔係為戴卓爾夫人脫罪，因為我有睇過一啲 Documetary，當中指出，其實戴卓爾夫人當時仲有最少一條路揀，方向基礎其實類似南韓政府响2010年左右對 Hyundai 同 Kia 所做嘅咁。但以1980年代英國嘅經濟 + 社會狀況形成嘅政治氣候環境，真係只好一句「講經咩」。