早前受新型冠狀病毒（武漢肺炎）擴散影響，澳門政府一度頒令娛樂場所停止運作，巴士乘客量銳減，自2020年2月初有部份巴士路線減班或者轉用較細型號巴士。
因應澳門各行業陸續恢復運作，之前受影響嘅巴士路線由2月中開始轉用返原有巴士車型，減少咗班次嘅巴士路線亦分批續漸補返班次。
澳門交通事務局同當地兩間巴士公司協調後，由2020年3月2號開始再增加返巴士服務班次，預計全日運載力恢復返去原來嘅90%；其中，上、下午繁忙時段達到原來運載力嘅95%。
同一日亦會恢復5AX、5X、10X、MT5號巴士路線運作，以疏導早、晚繁忙時間客量；至於往返澳門大學校園嘅71、72、73路線，上、下午繁忙時段回復正常班次，夜間路線N6則恢復原行程進入澳門大學。
澳門交通事務局會呼籲乘客留意有關安排，局方會密切留意各路線運作情況，並且及時檢討、作出調整。
當局並重申面對新型冠狀病毒（武漢肺炎）疫情，乘客謹記乘搭巴士必須佩戴口罩、注意個人清潔衛生。當局同時會嚴格要求巴士公司留意車長同埋其他員工嘅身體情況，確保巴士站點以及巴士車廂設施有消毒清潔，避免病毒傳播。
Be the first to comment