提起「中巴」，即係「中華汽車」，對於香港一班資深巴士迷都肯定有唔少回憶，隨著中巴柴灣巴士廠黯淡落幕，「中巴」對巴士迷嚟講係咪無嘢留低呢？
梗係唔係啦！
中巴多年嚟都有自行保存住1架1949年12月11號首次登記嘅Tilling-Stevens Express K5LA7前置引擎單層巴士！而因為巴士引擎室個蓋無上油，金屬原本嘅銀白色份外搶眼，所以就有個外號叫「白水箱」。
呢架巴士當年嘅車輛登記係「4943」，喺1967年退出客運服務之後，曾經拎咗去做訓練巴士大約1年，然後去咗灣仔碼頭巴士總站做「茶水站」，再之後賣咗畀北角1間煤倉當寫字樓咁用。
時間去到1971年，時任中巴交通經理李日新先生經過嗰個煤倉而發現到呢架巴士，佢自己出咗50蚊買返（編輯補加資料：當年香港就業人口月入中位數仲未到1000蚊），再拖佢返北角車廠，希望將呢架巴士重建，李日新先生靠翻查圖片同搵啲退休伙計幫手，用4年時間將車身同車廂重建返1949年個樣。李日新仲特別去運輸處申請個舊啲嘅車輛登記號碼，由於當時得「HK104」，結果呢架「白水箱」就改用呢個號碼登記，並且得到適當照顧，可以每年去驗車續牌，直到2015年10月「15年車齡限制」為止。
由於中巴柴灣車廠需要拆卸，中巴決定將呢架巴士交畀Island Vintage Bus保育，經過初步維修後喺2020年1月19號出席「香港車會嘉年華」展示畀公眾睇。
當然，保育唔只淨係得「揸出街畀人見吓影吓」咁簡單嘅，Island Vintage Bus認為令更多人認真了解同實在參與到保育更為重要，所以佢哋一直打算搞一啲導賞團，喺畀機會「白水箱」做吓運動嘅同時，可以用齊「人、物、事」多方位，畀參與者喺有趣味同有意義嘅活動之中，更深入咁了解呢架巴士同埋類似嘅保育工作。
筆者有幸獲邀參與咗2020年3月7號舉行嘅「試團」，當日下晝得到Island Vintage Bus發出嘅仿．中巴舊式「巴士飛」，可以上「白水箱」感受吓呢位70歲「老人家」有幾「老當益壯」之外，活動中仲聽到團隊講解返「白水箱」嘅故仔、佢哋點樣保育同維護呢類型嘅古董巴士。
按照團隊嘅意思，佢哋搞呢類「導賞團」嘅目標，唔係巴士迷所謂「益車」嘅嗰一種「遊河」，而係希望做到每團4~6個人、以真正歷史愛好者為本咁，去交流返香港歷史、古董保育嘅資訊。
根據Island Vintage Bus團隊所講，只要他日疫情緩和加上情況許可，佢哋將會籌辦專屬活動畀參與過「Bring Him Home」以及「Restore Their Glory」嘅善長仁翁。
不過呢~現實問題嚟嘅…始終資源有限，而且仲要顧及活動安全等因素，呢類活動係會限定每次參與人數，而參與者都要出返啲錢彌補返活動成本，等到Island Vintage Bus準備好嘅時候就會用電郵通知有關人士詳情。
如果大家想捐助Island Vintage Bus嘅巴士保育工作，可以去佢哋嘅「Restore Their Glory」眾籌網頁睇睇。
Be the first to comment