香港電車自從1904年就帶市民穿梭香港島東西，縱使幾次轉變車殼，外表卻仍然一直貫徹傳統，成為香港獨有特色。話雖如此，香港電車近年內在仲係保持著一顆年輕、積極、活力嘅心，以「笑聲笑聲 滿載叮叮」為公司之本，展示「叮叮」願意為市民共同創造快樂回憶。
為咗貫徹呢個意念，香港電車喺2020年搵嚟香港本土插畫家陳塵合作，推出《香港電車 x Dustykid 聯乘企劃》，透過2013年正式誕生嘅Dustykid（小塵），利用佢嘅圓大眼睛、快樂笑容，同電車一齊喺香港面對逆境嘅呢一刻，溫暖香港人嘅心靈。
《新年分享愛》藝術電車
香港電車將旗下#170千禧電車變身為《新年分享愛》藝術電車，車身上充滿繽紛愉悅嘅Dustykid（小塵）插畫，「塵家族」成員陪伴市民一齊搭電車，同「叮叮」一齊為香港市民送上祝福，沿途分享愛同快樂。
香港電車 x 小塵《叮點塵語》
#65電車車廂同埋位於中環銀行街、灣仔杜老誌道嘅兩個電車站都加上咗《叮點塵語》佈置，為香港呢個忙碌嘅大都市，注入溫暖人心嘅叮嚀祝福，期望為乘客喺旅途上加添一分快樂。
講返《叮點塵語》呢個項目，靈感係嚟自電車路上你我他嘅故事，提醒返大家無論生活有幾煩躁，仍然要畀心靈一啲空閒，並且同身邊人分享愛與快樂。
香港電車 x 心事如塵茶食亭《叮點幸福茶飲系列》
香港電車喺2020年2月同小塵位於上環皇后大道中255號曼哈頓大廈地下G01B號嘅心事如塵茶食亭（舖面向著禧利街）合作，推出全香港首個以公共交通工具為主題嘅茶飲系列。
香港電車過去百年見證歲月點滴，滿滿人情味配上裊裊茶飲香，希望能夠為乘客喺路途添上溫暖。
《叮點幸福茶飲系列》內裡嘅主調係「細味叮點幸福」，香港電車揀咗 4 個經典電車站做代表，以承載電車路上濃郁人情味做背景，配合返心事如塵茶食亭嘅 4 款茶飲，再加上附送一張有喻意嘅特別版「叮叮 x 小塵 – 叮點幸福」貼紙，期望溫暖路途上嘅每一個人。
今次《香港電車 x Dustykid 聯乘企劃》尚有其他項目，下一個會喺嚟緊3月中推出，希望香港人面對當前逆境，仍然可以樂觀迎難而上。
1 Trackback / Pingback