2019年12月25~28號期間喺灣仔會議展覽中心1號館舉行嘅第17屆香港冬季購物節，其中香港本地玩具商東方玩具有限公司旗下牌子微影為推廣佢哋其中一款與遠大貿易有限公司合作推出嘅展會限定現貨玩具巴士「鹹牛肉紅燈籠」，特別安排咗保育緊嘅「紅燈籠」古董巴士到展會坐陣。
講返歷史，呢架「紅燈籠」原本喺1978年3月22號投入服務，係九巴一架配備英國鋁材公司（BACo）車身嘅利蘭FE33AGR「珍寶巴士」（原車隊編號D989，原車輛登記BT207）。
因為BACo車身外觀四四方方，加上車頂平坦，所以外號「四方寶」/「平頂寶」。另一方面，為咗同當年嘅中巴車身色彩區分，九巴為呢種BACo車身嘅「珍寶巴士」設計咗紅色佔大比例嘅車身色彩配搭，「紅燈籠」呢個名就係咁嚟喇！
而呢架「紅燈籠」接載一眾乘客多年後，喺1992年2月20號退出客運服務。九巴其後喺1994年4月將佢捐贈畀香港幼兒教育及服務聯會，巴士內外大幅改動後重新領牌，當年新車牌係FZ2496，作為宣揚認識同珍惜大自然之用，車身更油咗卡通化字型嘅「Nature Bus 大自然巴士」。
不過自從2003年開始，呢架「紅燈籠」就無人幫佢續牌，並有傳長期擺喺九巴九龍灣巴士廠――而根據讀者報料，呢架「紅燈籠」曾經泊喺西貢三杯酒幼聯旗下農場嘅停車場好多年。
去到2008年就被發現長期停泊喺大埔滘公眾停車場內。直至2011年4月10日，呢架「紅燈籠」就被人買入並進行修復，慢慢變成展會所見咁樣。
一般入場人仕見到「紅燈籠」實物就係上面啲相咁…而喺現場買微影啲嘢買夠2000蚊或以上就可加100蚊換購上車證一套，或者可以直接畀200蚊買上車證一套，每套上車証可1-2人上巴士參觀5分鐘。
至於如果係要負責埋起壇同拆檔嘅工友就可以喺展會玩埋「拜四角」。
當然有得開埋巴士車尾引擎艙蓋就不妨研究埋嗰副吉拿6LXB引擎啦！
又…是咁的…有人話「拍埋個老人家影相就會顯得自己睇落後生啲」，所以側邊攤檔啲姐姐一於唔執輸，搵「紅燈籠」一齊大合照。
「紅燈籠」咁大件梗係唔可以香港冬季購物節喺12月28號一完場就即刻走啦…佢要等到周圍啲檔口拆得八八九九先至走得到，由會展出到公眾道路都已經係2236時。
但係呢~佢第二日就又要出席「牛河」活動，大家睇吓會唔會又喺街見到佢…記得唔使好似《奪命狂呼》咁以為撞見死神而驚呼狂叫嘅！
2 Trackbacks / Pingbacks