【野生捕獲】ISUZU NPR75 中型巴士，好似差唔多 Ready

舊年聖誕節前，Isuzu 香港代理「合眾汽車」舉行車展及簡介會，展出及向旅遊巴士業界介紹多款全新旅遊巴士。除咗大型旅遊巴士 LT434 (裝配亞洲車身廠 Asia Vero II 車身) 及 LV452 (裝配捷聯 JL-020 車身) 之外，仲有裝配捷聯最新設計 JL-021 車身嘅 NPR75 中型巴士。

去年12月中旬 ISUZU 代理合眾汽車舉辦車展會場展出的兩部Isuzu NPR75 配捷聯 JL-021 車身中型巴士
(資料圖片)

除咗該部 LT434 早已「名車有主」並已經在較早前交付客戶，NPR75 中型巴士好似都有好消息。事關日前响汀九橋野生捕獲一部全車白色的 Isuzu NPR75 中型巴士，駛向往青衣嘅出口。

事後本台就同捷聯車身廠聯絡「八卦」，確定到被我哋「野生捕獲」嘅嗰部，正是車展當日展出，車尾無輪椅升降台嘅「普通版本」Demo car，前赴青衣驗車中心進行 Type approval 第二輪驗車嘅 Tilt-test。

言下之意，似乎旅遊巴業界對呢款裝配上捷聯 JL-021 車身 Isuzu NPR75 中型巴士都有正面反應，甚至可會有客戶已經「扑鎚」？但我哋恪守返一啲原則無追問詳情。

呢款裝配上捷聯 JL-021 車身嘅 Isuzu NPR75 中型巴士，型號 NPR75MLEB。配備嘅引擎為已經非常普遍嘅 4HK1，排氣量 5.2L，動力輸出為 190PS / 52kgm。波箱為6前速「機械式」自動波，附「加減波」操作。雖然底盤型號 NPR75 與同品牌嘅貨車相同，但正如 Isuzu 代理「合眾汽車」响車展當日嘅簡介會上指出，呢款客車用嘅 NPR75 底盤嘅懸掛採用咗客車用的「軟式彈弓片」，與及換上闊輪距 (Thread / track width) 前軸，加上我哋响多篇文章/影片說明「底盤無分載貨定載人」，底盤配備都應該再無爭拗之處。

至於車身，全長8.1m，闊度2.16m，載客量 30座位。另有長度7.1m 選擇 (即如復康小巴)，最高載客量 23 座位；另可以選配加裝輪椅升降台等設備。

呢款 JL-021 車身乃捷聯車身廠嘅自家設計，連同已經出牌嘅「復康巴士」嘅幾部樣版車，都係捷聯响其位於元朗嘅廠房裝嵌生產。將可以話係「上一代」嘅 JL-011 車身比較，JL-021 嘅外形可以話圓潤中帶點硬朗，尤其是 A柱同車尾嘅線條比 JL-011 嘅差別更為明顯；頭幅鬼面罩雖然仍有 JL-011 嘅神緒，但 JL-021 嘅線條相對來得簡潔。

事實上，前文已有提過 Isuzu 類似嘅做法响台灣及印尼已經運作咗好多年。而其中响台灣嘅做法，包括 Isuzu 提供嘅底盤為「無屋仔」嘅 Raw chassis、懸掛及前軸規格，與及車身裝嵌模式，同今次响香港嘅可以話一模一樣。而 Isuzu 响台灣嘅中型旅遊巴士市場嘅銷量亦不俗，至於香港能否創出同樣嘅佳績就有待時間印證，但至少讓市場有多一個選擇。同埋若果車身都能安排在本港廠方裝嵌，總算推動本地巴士車身工業發展。