九巴90週年嘉年華，等到天荒地老已經曲終人散

「九巴90週年嘉年華」圓滿結束，不過最多人講嘅唔係「好玩」，而係「好慢」！

一如以往的「傑出車長選舉暨車廠開放日」要入場要排隊，就人人都預咗㗎喇，不過今年九巴可能想突顯「推動資訊科技發展」，要入場人士喺入口掃~~安心出行~~ QR code 登記及核對門票先至可以入場，但由於人潮汹涌，加上可能套系統運作遲鈍，導致入場過程時間大幅延長。根據其他交通平台報導，也許主辦單位見人龍越來越長，為免「爆煲」突然取消唔使嘟 QR code 都可以入場，變相令到唔少未有入場券嘅市民都可以「長驅直入」，引起唔少早前以APPS 積分換領門票嘅人士非常不滿，認為九巴今次嘅入場安排混亂兼對佢哋造成不公平，個別更埋怨甚至叫囂要求九巴退還申領門票的 300 分 APPS 積分！

「好慢」唔止係入場過程，喺會場入面都一樣！買模型要排隊、參觀古典巴士亦要排隊、玩攤位遊戲更加之又要排，而且隊尾標示嘅輪候時間全部都係60分鐘起跳，人生到底有幾多個60分鐘可以要嚟用响呢啲排隊呢？可能大家平時去食放題都等唔少，但起碼等到有得食；不過今次等到又點呢？據筆者有朋友表示，大約四點先至排到隊入場，但入到去啲攤位都截龍，即係白行一趟。

朋友原本打算影返幾張相算，入到會場見到因為無咗傑出車長選舉嘅駕駛比賽需佔用嘅地方，場地空間大咗，可以走動嘅空間的確多好多。但係活動展出嘅巴士唔多，攤位擺放亦都鬆散，令到空間多到有啲突兀。而大合照區嘅六部新車，同古典巴士區嘅四部巴士，加埋展出只有十部車，而且擺位都比較密麻麻，莫講話對於影慣「標準相」嘅巴士迷大嘆無癮，就是求其近近哋影相，九巴聘請嘅管理公司嘅疑似職員十足十响大陸啲商場、公園嗰啲「城管」咁，不斷用各種「身體語言」企响啲巴士面前，根本想影張正常少少嘅相都影唔到。

不過，今次嘅古典巴士區並無如以往BCOY 架設圍欄，甚至罕有地容許入場人士上車參觀。表面上值得一讚，可是車上無職員看管，任由參觀人士「乜都玩得一餐」，當然唔少得啲小朋友亂撳車上按鈕、用力拉扯車門、試圖起動引擎…. 九巴還有心保存這些「歷史文物」嗎？再對比返車外的「城管」阻礙拍照，實在不知道九巴「到底想點」。

我哋聯絡過曾有意入標申請今次活動管理統籌嘅公司，唔願意公開身份的負責人表示，九巴份標書載明入標公司要有「管理非巴士活動類別嘅世界級展覽經驗」嘅條款。無錯，有「世界級展覽經驗」的話，確實牌面上令人有信心，但無管理過巴士活動的話，知道管理巴士展覽有乜要注意嗎？淨係講返啲小朋友响車上嘅行為，已經不用再講外國嘅巴士迷同香港嘅有何分別！