Volgren 生產氫燃料電池電動巴士

澳洲巴士及客車車身製造商 Volgren 宣佈，將會利用澳洲維多利亞州政府嘅撥款，開發澳洲首批由本地設計同製建造嘅氫燃料電池電動巴士。

Volgren 嘅電池電動巴士喺生產上不斷採用唔同嘅嶄新技術，而開發氫燃料電池電動巴士嘅計劃更令車廠技術更上一層樓。

首批兩部車將會透過當地「可再生氫商業化基金」撥款，喺 Dandenong 廠房製造。Volgren 表示，新車嘅展示車同測試車預計將會喺 2023 年年中完工，目前正物色適用嘅 OEM 底盤，並同製造商進行溝通。

維多利亞州政府計劃於 2050 年實現溫室氣體零排放，選擇以清潔能源驅動巴士，絕對有助達成呢一個目標。而政府透過基金補助生產商同營辦商優先考慮可再生能源嘅交通工具之餘，亦同時促進本地就業機會。

新巴士會配上 Optimus 單層巴士車身，氣體儲存、高壓系統，以及電池存儲系統都符合安全要求。據估計，氫燃料電池電動巴士同柴油巴士相比，每部車可以每年減少約 30 噸二氧化碳排放量。而每部車嘅壽命亦最少達15 年或以上。