因應武漢肺炎持續大爆發而可能打個乞嗤都係確診要隔離，醫院被塞爆之餘，救護運送服務亦供不應求，更曾出現全香港所有緊急救護車全數出動、引致無法適時回應召喚嘅危急情況。
另一邊廂，非緊急救護運送服務亦因為需要隔離人士數量激增，同樣應接不暇，有服務使用者就算已經被安排「上到車」都要久候幾句鐘，無疑服務提供者同使用者都唔好受。
有見及此，繼上星期有的士支援運載服務，為咗減輕前線救護人員嘅工作負擔，香港多間非專營巴士同埋專線小巴營運商喺接受咗消防處簡單防疫須知訓練後組成「專屬抗疫巴士」車隊，協助運送需要接送嘅病人。
當香港消防處喺2022年2月20號約咗業界搞簡佈同埋指導之後，由大約150架非專營巴士以及50架專綫小巴組成嘅「專屬抗疫巴士」車隊，2022年2月21號朝早正式投入服務，支援運送輕症甚至無症狀確診武漢肺炎患者去竹篙灣、隔離酒店等設施。
「專屬抗疫巴士」車隊喺2022年2月21號朝早大約8點率先去到位於鄰近貨櫃碼頭4號迴旋處嘅運輸署駕駛考試中心集合，並喺現場分發物資以及為車隊張貼「抗疫專用」嘅車身貼紙，消防處亦有官員到場視察並且對業界支援救護人員致謝。
及後朝早10點，為數大約20架參與服務嘅車輛出發前往海洋公園停車場🅿️參加記者發佈會，記者會期間更有工作人員即席向傳媒展示如何為車廂噴灑抗菌抗病毒塗層，並且講解防疫保護措施以及具體運作安排。
根據業界人士講解，為數大約200架「專屬抗疫巴士」會分成5隊，採用輪班制模式接受香港消防處控制及通訊中心調派，接送初步檢測後對病毒感染呈陽性嘅患者前往社區隔離設施。
所有參與嘅「專屬抗疫巴士」都會喺車頭左側以及上落客門貼上「抗疫專用」標貼以作識別，仲會喺駕駛室後方裝上分隔透明膠篷，以及為車廂噴灑光觸媒，盡量減低司機面對嘅感染風險。
另外，如果「專屬抗疫巴士」原本係全密封式車窗設計嘅話，就會將「太平門」上嘅玻璃或者緊急門柄嘅蓋掩拆走，加強通風。
業界代表喺接受訪問時指出，香港消防處已經為所有將會駕駛「專屬抗疫巴士」嘅司機提供基礎防疫訓練，包括穿著防護衣以及車廂消毒嘅程序，加上有明確指引例如乘搭人士必須坐喺車尾，相信能有效降低司機嘅感染風險。
至於派車安排就會由香港消防處為個案作出分流之後轉交予今次提供「專屬抗疫巴士」所屬嘅商會——公共巴士同業聯會 以及 專線小巴持牌人協會統籌同埋編配車輛，希望盡量縮短確診人士嘅等候時間。
業界代表另外表示，已經訂立清楚守則指引，包括防護衣服穿卸程序、用膳、如廁嘅地點安排，盡量避免對社區造成額外感染風險。
其中一個主要措施係所有參與駕駛「專屬抗疫巴士」嘅司機，都會去返鄰近貨櫃碼頭4號迴旋處嘅運輸署駕駛考試中心集合用膳，由聯會派人代為購買飯盒，避免司機要喺社區周圍走而接觸社區人士。
當講到呢次「專屬抗疫巴士」會維持幾耐，業界代表話會不時同相關部門溝通，有需要時佢哋都會繼續支援救護人員，直到香港捱過疫情。
Be the first to comment