小巴 CALL LOAN 斷供拖車，血流成河死傷枕藉神仙難救

近日傳媒報導小巴因牌價估值下跌，唔少人「食花生」之餘就是落井下石。事關小巴呢種公共交通服務予普遍市民嘅印象都唔好得去邊，甚至可謂犯眾憎。撇除對行業一知半解加政治上腦去理解報導重點之一嘅「潮聯小巴商會」，單純於服務質素而言都好難得到普羅大眾正面觀感，難怪報導一出，坊間、網上嘅迴響一面倒的「小鳳姐召喚」且非常巨大。分析呢件事有好多個角度，例如財經、政策之類，仲有嘅當然係呢度嘅專科，關於呢個行業本身嘅問題，拆局點解搞成咁嘅田地。

可能唔少人即時反應諗到豐田嘅問題，但客觀而公正啲講，呢個只係「症徵」，唔係成因。反映住嘅係小巴行業嘅不思長進，無實踐董建華金句之一嘅「與時並進」。

嗱，我必須強調無任何針對豐田呢個牌子或其本港代理嘅意圖；又如果想繼續老屈的話，麻煩先抽空睇返 EP21 Toyota Coaster 以為我哋一定無? 一次過嚟三部 XZB50 XZB59 XZB80 呢一集節目。

「不思長進」所指，係行業「慣咗手勢」，無諗住要推陳出新，或俗語所云「upgrade 自己」。無錯，宏觀全世界小巴車種選擇唔多，而即使集中於豐田 Coaster 去講，唔係無辦法做好啲。可是業界嘅思維總是「做好啲，啲客唔會俾多一個仙」，往往等到「殺到埋身」焗住要做先至死死氣睇吓有無得揸流灘去做。

例如舒適啲嘅高背座椅，不論豐田 Coaster 定係三菱 Rosa (以至日產 Civilian)，老早响日本本土市場有得選擇。而且，响1980年代中後期出口到中国嘅豐田 Coaster B20 系已經係高背座椅 (當年有响深圳橋社 / 和平路車站搭過去南頭、西鄉、沙井、松崗嘅必定有印象吧)。但香港小巴業界偏要等到政府立法 (座椅要有安全帶) 先至做。

或例如落車鐘，雖然只係响綠色專線先至有實質作用，但坊間輿論引起政府嘅要求，先至求鬼其其安裝。但又其實响1984年三菱ROSA「香港第二版本」已經有在日本原廠安裝好。直到近年因為專線嘅發牌條件寫明要有落車鐘，衍生到市場需求，先至有廠商生產供應啲款式企理少少嘅設計。

不錯的，乘客唔會因此而俾多一個仙，但所謂「見微知著」，難免使市民滿腦子積累對小巴嘅負面印象，如今所謂大環境對行業產生不利因素嘅時候，坊間無人會同情亦可謂「睹始知終」。除咗車輛設備於服務質素之外，綠VAN脫班、紅VAN中途「過車」(最常見旺角/佐敦道往元朗於青龍頭豪景花園。其實係違法的) 等嘅乘客合理、合法權益得過且過，甚至維持幾十年嚟黑道橫行思維一味靠惡壓制，根本上市民對小巴充斥怨氣，如今借勢以牙還牙，起勢狂打落水狗咁，業界真係與人無尤。

另外，當然好多人諗到「炒牌」嘅問題，認為如今就是報應發生。業界可能認為「個牌係我嘅，我搵到錢係我本事」。但只顧炒牌賺過盤滿缽滿，忘記咗個牌本身要「為人民服務」，正宗「發財唔立品」。仲唔信邪的話，咁就得相對地姑且「抽死人水」，捷輝結業之時全城嘆息，正是捷輝「生前」盡過力做好份內責任。但其他經營者，別說大多數一直以「乘客唔會因此而俾多一個仙」在謝老闆背後恥笑佢 OnL79，單是前段提及種種所為，足以令坊間「今鋪慌你唔死得再踩多幾腳仲要鞋底扭捽多幾吓」，以至那管進智、馬氏家族假若真的倒下，全城「熱烈地彈琴熱烈地唱」勢是必然。

也許業界想指出「單純經營小巴服務即使不虧蝕也無利可圖，依賴牌價升值維持經營」。好吧，若此途可行，為何只會總體服務狀況有如過得一日得一日？要不是將「升值」得來的資金挪移他用，就是根本唔止係無利可圖，而係鳥不生蛋。攞咗啲錢去第二度就不用再多講可以直接爆 seed 嗌收皮收檔DLGHPKHKC；至於鳥不生蛋嘅問題，循經濟學角度去睇，何不及早壯士斷臂止蝕離場？仍要繼續磨爛蓆，豈不比捷輝謝生更加 OnL799？

曾有業界中人謂道，問題在於運輸政策保鐵獨大 _{(但另一邊廂話我祭出「拜鐵路教」一詞係偏激偏頗)}，路面空間就給專利巴士肆意「霸佔」，小巴只能在極狹窄的夾縫中生存。這個陳述的而且確係事實，更是鐵一般的現實。但是小巴業界幾十年嚟有無試圖去改變呢個局面？單是2015年立法會「公共交通策略研究」關於放寬小巴座位上限一事，在政界一面倒全力支持加到20座但進智公交行政總裁陳文俊對運輸署拋出19座位公開表示收貨 _{(所以佢個朵叫做19CEO囉)}，已經充份反映業界根本只圖得日過日，無打算去改變所謂大局。

甚至回溯至1983年冷氣小巴出現、1988年14座增加至16座，可以話兩個契機時間，但業界都無好好去把握。或者可以抵賴英國佬「養」得小巴業界太過安逸，毫無意識要去改變。但响2000年左右，環保署推行石油氣小巴，只要稍為會做資料搜集就會知道時任助理主任莫偉全好一句「搵唔到有柴油小巴達到 Euro 3標準」根本係一個驚天絕地嘅超級極度大謊言，但就只有已仙遊多年嘅「黎秘書」(的士小巴權益關注大聯盟 黎銘洪) 當場質疑直斥係咪有不法勾當，同埋捷輝爆完SEED再用實際行動去踢爆 (「爆」嘅程度可以講真係核爆級。唔明就睇下面張相嘅 caption)，其他的小巴佬諗乜？咪就係好似的士咁，貪圖慳咗燃料成本之後有空間加車租然後推高牌價囉！

或是到2002年立法小巴座椅要裝設安全帶，除咗先至引入前段提及嘅高背座椅之外，業界一面倒認定只能買新車 (其實只係借勢換石油氣車)，但有小巴公司擬將舊車更換座椅及改裝相關車身結構以節省成本，全個行業又係對此嗤之以鼻，甚至直言狠批呢間公司「咪L咁H多事好唔好」。就算我冚住唔講呢間公司其實又係捷輝，相信任何腦部健康正常嘅市民都會睇到小巴佬十居其9.9都係只圖不務正業地CAP水搵錢。

加上乜叉「小巴三寶」─ 黑盒、限速器、車速顯示器，以至到新鮮滾熱辣嘅安全帶警示器，綜合晒呢堆歷史，可以睇到整個小巴行業對於其本業嘅發展，好聽啲講就係被動，難聽啲講係政府踢一踢先至郁一郁。更是睇到幾乎乜都係政府話乜就全盤照單全收。就連小巴司機駕駛執照強制培訓，佢哋當時都話支持「可以提升司機素質」，結果咪搞到「小巴司機平均年齡超過60」囉。然後到輸入外勞，原來個「棍頭」考牌 FAILED 都要俾人工嘅時候先至知道中晒伏而呻笨囉。相信大家睇到呢度，必定認為小巴業界只會「信政府，不用怕」，然後就會一句「Yo, Call Loan 之嘛，信政府咪得囉」，仲嘈乜話乜嘢傳媒誤導唧！

由此可見，小巴行業之所以搞到今時今日咁嘅田地，一切都係咎由自取，惡果自招。無法子，當睇見啲酒樓收檔裝修做老人院、劏舖商場「印印腳唔駛做有錢收」，小巴佬再望見馬氏家族HOLD 住一堆物業就盤滿缽滿，誰不想尋租得道悠閒過日，就算要做都只想 $1成本得 $10,000 嘅收益。只不過如今連馬生都要賣舖填小巴個大咕窿嘅時候，就要講句佛偈「本業不為當，唯圖貪大勢，到頭來空歡喜咪一場囉」。當一個向公眾提供服務嘅行業幾乎所有經營者無打算做好本份，到頭來被整個社會唾棄是正常不過的吧。

後記：置頂 Cover Photo 係有特別用意的 ─ 小巴業界普遍思維其實停留於 Nissan Echo 盛行嘅1970年代。並且認為用返 Nissan Echo 係最好的，結構、技術簡單，維修無煩惱，錢又搵得到。