之前講到，隨著政府公佈新皇崗口岸啟用，城巴宣布3條全新嘅城巴皇崗專線 B13、B14、B15 號巴士路線會喺 2026 年 10 月 12 號同皇崗口岸同步投入服務。其中 B14 號巴士路線提供由啟德以及宋皇臺站往返皇崗口岸嘅特快直達服務，巴士站亦鄰近新蒲崗以及九龍城住宅區。
2026年10月9號城巴喺九龍啟德世運道簡約公屋南面入口對開嘅巴士站舉行記者招待會表示呢條路線停站少、車程快，全程取道中九龍繞道、大欖隧道、新田公路等快速公路，由九龍市中心出發最快只需要 40 分鐘就可以直達皇崗口岸。營運初期服務時間定喺每日上、下晝繁忙時間嘅0800~1100時以及1800~2100時，成人全程車費港幣 20.8 蚊。
對於B14號巴士路線只喺特定時段提供服務，城巴營運總監馬詹唯喺2026年10月9號嘅記者招待會回應提問嗰陣表明，日後會因應整體乘客量，主動向政府就延長服務時間進行溝通。
2026年10月9號城巴舉行記者招待會期間，有附近居民聞訊到場了解新巴士路線嘅資料，據佢哋所講，因為生活所需經常需要北上工作，以往啟德新發展區缺乏輕易抵達口岸嘅專營巴士服務，呢次城巴開始新路線「真係方便咗好多」，而呢啲直達口岸嘅專營巴士路線「係大家街坊等咗好耐嘅嘢」。
可以預期，呢條巴士路線係「有客路」嘅
亦一早有意見話要提升到全日服務
開線未夠一個星期，城巴B14號巴士路線就已經有唔少捧場客，喺啟德（世運道）以及皇崗口岸兩邊總站，候車乘客都排起長龍。
有見及此，城巴喺2026年10月16號正式宣布，由2026年10月17號開始，往返啟德、宋皇臺一帶以及皇崗口岸嘅城巴皇崗專線B14號巴士路線會延長服務時間，由原有只喺上、下晝繁忙時間提供服務，以試辦方式全面提升做全日服務，首階段維持到2026年11月1號。
城巴表示，自皇崗口岸新大樓啟用，城巴持續分析乘客對於九龍市區以及港島區往返皇崗口岸嘅交通需求。旗下B14號巴士路線全程取道高速公路，乘客由啟德以及宋皇臺一帶出發，最快大約40分鐘就能夠直達皇崗口岸，開線短短幾日就已經吸引大批啟德、宋皇臺、九龍城以及周邊地區嘅市民，率先體驗新路線以及新口岸有幾方便。
城巴話經過審視整體營運數據之後，城巴喺B14號巴士路線開辦後首星期即時向香港運輸署申請延長服務時間。
由2026年10月17號（重陽節長假期首日）開始，B14號巴士路線每日服務時間會擴展：
- 前往皇崗口岸嘅北上班次：0800~2100時
- 由皇崗口岸開出嘅南下班次：0700~2300時
有關服務時間以試辦方式進行，首階段維持到2026年11月1號，並且視乎實際乘客需求，積極考慮將全日服務安排「恆常化」。
城巴相信，全新服務時段能夠進一步鼓勵各區乘客，善用城巴現有巴士網絡或者港鐵網絡（宋皇臺站），全日輕鬆轉搭B14號巴士路線往返皇崗口岸，方便即日往返深圳嘅跨境人士玩得更夜、更盡慶。
同時，為咗方便市民喺重陽節長假期體驗皇崗口岸新大樓，城巴皇崗專線B13號巴士路線亦即時加開快速班次，跳過錦田、新田，縮短整體車程，乘客由中環上車前往黃崗口岸只需要 48 分鐘，由北角上車亦只需要 58 分鐘。
城巴重申會密切留意口岸客量需求，並且已經預留充足後備巴士以及車長人手，按實際情況喺適當時候加密班次以迅速疏導人潮，確保口岸交通順暢。
Be the first to comment