梅艷芳紀念巴士唔俾泊真係因為有投訴??

梅艷芳紀念巴士未能泊入沙田文化博物館一事，唔少人試圖「捉鬼」欲找出投訴人大肆炮轟洩憤，但有試過被「撳住抄」而响票控過程中聽到執法人員言道「我哋都唔想㗎，但有人投訴」嘅經驗的話，都知道「投訴」呢兩個字根本只不過係台灣歌手張信哲經典名曲《沒有人知的故事》。

但撇除康文署回應傳媒「三個泊位好危險」即係前言不對後語而可以衍生出一大堆陰謀推論，作為香港同旅遊巴業聯繫最密切嘅傳媒，要收風誰是投訴人根本無乜難道可言，只不過正所謂米已成坎「捉到又點呢」，唔通又嚟小學雞式杯葛咩。不如從實際營運嘅角度分析，為公眾提供多啲資訊去思考吓件事好過啦。

首先假設「投訴」係堅嘅，道理上應該係响原訂「車展」嗰五日會有柯打去文化博物館嘅旅遊巴公司。不過，通常會租旅遊巴去博物館嘅客人，十居其七八都係學校，但12月30至1月1日係學校假期…..

無錯，1月13、14兩日只係平常的週末，但請問有邊間學校會星期六、日搞呢啲活動呢？唔係無，但真係鮮有聽聞囉。

再亦無錯，學校之外當然仲有其他機構、組織，甚至我响好多年前有做過鬼佬、台灣旅行團租車去 (台灣嘅客人講明係去睇梅姐)。但文化博物館停車場只有私家車時租泊位，至於旅遊巴…..

的確係有三個旅遊巴「泊位」，加得引號就當然唔係俾旅遊巴泊車啦，而係「即捕即解」── 即上即落即走。旅遊巴駛入時並非一如屋邨屋苑入閘嘟八達通，而係等响更亭嘅「食蕉」撳制開閘。落/上完客要開車走，係駛去「入」嘅嗰邊閘口，等職員開閘就「逆線行車」駛出文林路。亦因此，原本打算展覽「紀念巴士」而佔用嗰三個泊位，客觀上對旅遊巴業界係零影響。

的確，如果巴士展覽成事，多少都影響到駛至嘅旅遊巴，尤其是上/落完客要駛走時唔夠空間調頭，但亦唔係無解決方法，其中之一係暫時取消4至5個私家車泊位做臨時上落客位置，亦都夠位俾12米長嘅大車調頭走。或者私家車司機就會鬼殺咁嘈，但文禮路有錶位與及有一個「爛地場」，點計都仲有得泊車吖！甚至「左膠mode」一啲講，政策角度理應公共交通車輛優先嘛。或是衰啲講句「話晒係梅姐喎，唔係將就吓都唔得嘛」。

想唔得失啲私家車都仲有方法，就係將文禮路嗰邊「後欄」劃作臨時旅遊巴上落客區，乘客就向城門河方向行多幾步路，就可以出入博物館吧。(如下圖)

順帶一提，旅遊巴响文化博物館要「即捕即解」，落咗客到「Call 埋」期間啲車點算？好抱歉的，附近包括文禮路、文林路係無任何合法旅遊巴士泊位 (唔好講明愛幼兒學校出面有「晚9朝7」旅泊位啦！家陣講緊博物館開放時間嘅日間時份呀DLGH)

唔好話司機要醫肚最近要行過大圍，連去大圍診所借個廁所都隨時「三百二」。再甚至乎，真人直事，其中一次更是我親身目擊，聖母無玷聖心幼稚園放學時間，三部「BMW 電單車」衝入文禮路「大開殺戒」，唔好話等緊「上仔」，就是小朋友上緊車都「照抄」。除咗啲私家車司機 (同仇車L) 應該全部同我哋收嗲之外，亦睇到文化博物館 (even 之後變成嘅科學館) 嘅交通規劃幾咁荒天下之大謬，衰過十幾年前「膠樽苦主大聯盟」時嘅尖沙咀囉。

正所謂「方法擺晒响度，爭在做定唔做」。引伸出嚟，今次嘅「梅艷芳紀念巴士展覽」取消嘅真正原因係乜，好難唔惹起公眾猜測，甚至上綱上線成堆陰謀論滿天飛囉。