【新車速報】第一部 410PS 規格宇通旅遊巴士 – 榮利「樂園快線」仕様

「榮利」於去年訂購的宇通 ZK6127HQ (Marcopolo 車身) 旅遊巴士，再有兩部早前運抵香港，並在上週完成出牌手續。

從相片可見，兩部新車車身塗裝為「樂園快線」仕樣。規格方面，其中一部與去年出牌的四部相同，為裝配「玉柴」YCK9-350 引擎 – 排氣量 9,400cc ，輸出 342PS / 1500Nm。另一部則為首次於香港市場出現的「高性能版」，配備的引擎為 YCK11-410，排氣量10,979cc，動力輸出高達 410PS / 2000Nm。

配備 YCK9-350 引擎嘅宇通之前已做過測試介紹，至於呢部「410PS 版本」嘅表現如何，亦做咗短途測試。從「榮利」的車場出發不久，素來意見多多嘅 Uncle Lim 已面露滿意嘅表情。

佢第一個評語係「果然係410PS！」在未駛上公路前的一段路面，油門深度有如駕駛排氣量 3000cc 以上私家車「輕輕揩住」已經順暢而快速地加速，即使攀爬上昂船洲大橋一段斜路亦無需深踩油門。雖然係「吉車」，但亦能憑經驗預計滿載時嘅性能發揮差距唔會好遠。

佢仲有表示行車同軚盤操控嘅穩定都比之前測試嘅有進步「可以一如揸『好悶嘅嗰個牌子』咁，輕易控制到部車追貼行車線」「之前試嘅嗰一部都仲好似爭少少咁」。同埋迫力 / Retarder 操作都比「拍片嘅嗰部」都有改善。

純粹測試地速度錶指針 80km/h 而轉數錶指針約在 1100rpm，可計算出在高速公路以100km/h 巡航的引擎轉速將不逾 1300rpm，耗油量該不會是大問題，更能減少引擎的運轉損耗，有助維持引擎嘅可靠性。

車身同去年出牌嗰四部相同為 Marcopolo 嘅 Audace 1050，僅車身塗裝由「榮利」的標準線條換上「樂園快線」。

兩部新車已經投入服務，如果想乘搭的話，可向「榮利」票務熱線查詢，電話號碼 2397-0333。如想包車上廣東省玩的話，亦可以透過本台電郵或 Facebook 專頁PM，或與「榮利」聯絡洽詢。