「觀光城巴」再添一員 城巴組成香港最龐大開篷觀光巴士車隊

城巴最新一架開篷巴士正式投入營運，並且喺2025年5月30號假中環6號碼頭為呢架車隊中第18架開篷觀光巴士舉行啟動儀式，為巴士命名「光影香江」。

新車投入服務亦表示城巴車隊開篷觀光巴士數目已經多過全球最大開篷巴士營辦商 Big Bus Tours 喺香港擁有嘅17架開篷觀光巴士，令城巴成為全香港，以致全中國最大規模嘅開篷觀光巴士車隊。（筆者按：因早年中國大陸交通法規更新，2023年底起，中國大陸地區嘅觀光巴士已經改為全天幕式設計，開篷巴士已經喺中國大陸絕跡。）

啟動儀式上，除了宣布新車正式投入服務外，城巴亦同時改善咗之前五一黃金周備受批評嘅輪候上車安排。城巴指喺五一黃金周內，「觀光城巴」一共接待超過30 000名旅客，平均每日接載7 000人次。但每每喺總站輪候登車時，因為乘客眾多，而在繳付車費時經常出現混亂，因此城巴推出全新人流管理措施，端午節長週末期間進一步提升旅客體驗。

新措施將會喺「H1懷舊之旅」中環天星碼頭巴士站實施，巴士站將會設立嘅「巴士付費區」，乘客可以利用巴士站後方嘅付費機提前繳付車費進入付費區，職員會向進入付費區嘅乘客提供一張已付款證明。當巴士抵達巴士站嗰陣，已付費乘客可以直接登上巴士，免卻喺巴士車門付費而造成堵塞以及混亂。

「觀光城巴」將繼續提供「Citybus+觀光套票」用戶優先上車安排。購買套票乘客，可以喺另設嘅區域排隊，巴士到站嗰陣可以比一般付費區乘客優先上車。

城巴董事總經理 Richard Hall 回答傳媒問題期間亦表示，城巴開篷觀光巴士稍後亦會登陸東涌以及機場，連同昂坪360提供觀光巴士服務。同時城巴亦榮幸能夠喺中國提供最大規模嘅開篷巴士遊覽服務，持續助力國家旅遊發展，並帶嚟更多增長機遇。