「利物浦」20次頂級聯賽奪冠 球迷租電車遊街慶祝

近年，有一啲球隊奪得佳績之後都有香港支持者發起勝利巡遊，巴士台就曾經報道過：

• 2024年12月1號香港金牛籃球隊「金耀洋紫荊——香港金牛冠軍巡遊」
• 2023年6月15號曼城香港球迷會（MCFC Supporters Club HK）「曼城三項聯賽冠軍巡遊」
• 2023年6月3號Just For Fun Team「阿仙奴2022~2023年英超奪得佳績巡遊」

1892年6月3號成立嘅利物浦足球會（Liverpool Football Club），目前參賽級別屬於英格蘭超級足球聯賽（英超，Premier League）。2024年5月21號，利物浦官方宣佈前荷蘭飛燕諾（Feyenoord）主帥、荷蘭人艾尼・史洛（Arend Martijn (Arne) Slot）接替祖根・高普（Jürgen Norbert Klopp），嗰個新球季開始擔任球隊領隊。史洛接手高普留低嘅班底，靠着謹慎嘅輪換同埋戰術，以及提升球員多功能特質彌補部分位置深度嘅不足，球隊亦喺佢嘅調養下再度打出生龍活虎表現，大大威脅到曼城以及阿仙奴。

直至2024~2025季度英超34輪打完，利物浦以15分之差，提早4輪宣告第2次奪得英超冠軍，除咗係相隔5年再次奪得英超冠軍之外，亦追和曼聯（Manchester United Football Club）嘅20次頂級聯賽冠軍紀錄。

因應利物浦奪得佳績，香港嘅一班利物浦球迷就自發搵香港電車，2025年5月底喺#27載客電車披上特別設計嘅全車身慶祝塗裝。

2025年5月25號，香港呢一班利物浦球迷中午已經陸續雲集喺香港電車屈地街電車廠，佢哋當中有唔少人仲帶齊慶祝手幅、獎盃模型等，當#27載客電車喺1315時正式現身就齊齊同呢一架電車合照打卡留念。

香港呢一班利物浦球迷當中有60人仲可以上車參加香港版嘅「冠軍電車巡遊」，出發前當然唔少得嚟返張大合照！

呢架披上特別設計嘅全車身慶祝塗裝嘅#27載客電車，大約1410時喺屈地街電車廠出發，正式開始「冠軍電車巡遊」。

呢架電車一路沿香港島北岸嘅電車軌東行，途經上環、中環、灣仔等鬧市，1505時到達銅鑼灣崇光百貨前面嘅行人過路處，大批香港嘅利物浦球迷在場振臂歡呼！

身處銅鑼灣嘅呢一班利物浦球迷，眼見披上特別設計嘅全車身慶祝塗裝嘅#27載客電車行過，就即時紛紛衝晒出怡和街行車路「追車」，險象橫生，警方需要出動多車警員到場驅趕，「上返行人路！」之聲此起彼落。

警方眼見場面混亂，無法驅散銅鑼灣怡和街上一大批嘅「紅衫軍」，唯有指令披上特別設計嘅全車身慶祝塗裝嘅#27載客電車1515時由銅鑼灣電車總站駛走，折返屈地街電車廠。

以為咁就完呀？梗唔係啦！披上特別設計嘅全車身慶祝塗裝嘅#27載客電車會帶着呢個面貌服務公眾2星期，大家可以喺香港島北岸嘅電車軌睇吓有無緣相遇喇！

又…仲有一班香港嘅一班利物浦球迷喺2025年5月25號黃昏，租用香港電車旗下嘅#28派對電車，由屈地街電車廠巡遊到銅鑼灣再返去屈地街，沿途揮舞旗幟、高舉英超冠軍獎盃模型，同路邊嘅市民一齊歡呼慶祝。

嗱，即係咁講，有球迷話既然大家咁高興咁有氣氛，下次再有機會嘅話…

不如試吓搞埋電車免費乘車日吖！