城巴新巴即將合併 5款新城巴車身色彩 「中環夏誌」中展出 全港市民可以上網投票篩選

距離新巴以及城巴（專營權一）嘅合併日子倒數一個月，城巴有限公司喺2023年5月31號宣佈推出全新嘅企業品牌形象，並且隨即會安排陸續利用新嘅城巴品牌形像覆蓋原有嘅新巴品牌形象。

多年嚟城巴嘅C字箭嘴型公司品牌形象深入民心，呢一次更新嘅城巴品牌形象，簡化同現代化原有嘅紅色C字形箭咀，務求喺保持原有品牌形象神髓之下更形突出，繼續標誌著時刻向前以及節奏不停嘅公司企業精神。

城巴主席張堃先生表示，城巴自1991年進軍香港專營巴士服務，經歷咗三十幾年之後，會再踏出重大一步，同新巴融合為一個大家庭，呢一次合併會係公司更新品牌形象嘅完美時機，既為城巴嘅品牌形象注入更獨特以及現代化嘅元素，同時保留城巴同埋新巴嘅革新理念。

除咗更新企業品牌形象，城巴仲決定會為旗下車隊所有巴士更新車身塗裝。城巴自1979年喺香港提供公共巴士服務，巴士車身嘅塗裝一直以黃色為主調，為咗樹立全新嘅企業形象，公司設計咗5款新嘅巴士車身塗裝設計，概念分別源自保留城巴經典嘅黃色、以及早前推廣零排放轉型計劃「#MissionZero」嘅特別「拉花」設計。

雖然普羅大眾都知道呢類更新企業形象都係公司內部決定，不過城巴都做樣比公眾有投票選擇嘅機會：

公眾可以喺2023年6月9~18號期間，上去城巴特別設立嘅網站投票選擇心儀嘅新巴士車身塗裝設計，公眾投票之中得票最高嘅2款會進入第2輪投票，喺2023年6月20~27號期間再由城巴員工投票揀出最終結果。

為咗畀公眾更加清楚了解到呢5款新巴士車身塗裝設計，城巴安排咗5架巴士各自披上1款新巴士車身塗裝設計，安排喺中環海濱活動空間舉行「中環夏誌2023」活動當中嘅「One Citybus」展覽中向公眾展示（以下編號按照城巴投票網站編排）：

1號

2號

3號

4號

5號

會場所見，4號以及5號都係全車身噴油，其餘嘅1號、2號以及3號車身就只係「包膠」，所以喺參觀者之間就盛傳其實城巴早就已經有內部欽點：「4號以及5號作為最終候選嘅新車身色彩」云云。

嗱！江湖傳聞嘅嘢聽住先啦！
呢次難得香港仲有得畀公眾全民投票
大家唔好放過機會喇！

中環夏誌 Central Harbourfront SummerFest 2023

開放日期：2023年6月9號到7月23號
星期一至五 15時 ~ 21時
星期六、日及公眾假期 13時 ~ 21時
開放時間因應當日舉行嘅特別節目而更改。請留意特別節目時間表。

地址：中環龍和道9號 中環海濱活動空間 Central Harbourfront Event Space