為推廣綠色出行及新能源運輸，獲環境及自然保育基金資助，環境運動委員會、環境及生態局與及機電工程署將會喺2024年3月2日(星期六)主辦「綠色出行 零碳未來」新能源巴士體驗日暨嘉年華，地點喺九龍灣「建造業零碳天地」。講到明「新能源巴士體驗」，活動嘅其中一個重點當然就係有新能源巴士乘搭。
當日喺會場有各式各樣推廣新能源運輸低碳生活嘅展覽攤位及展板，目的係俾市民認識「綠色出行」嘅實踐方法。而為咗方便市民前往會場同埋即時體驗公共運輸喺推動減碳嘅成效同好處，兩家專營巴士公司更派出電動雙層巴士以至「新鮮熱辣」剛投入服務嘅氫能巴士，作為來往會場同指定地點嘅穿梭巴士。電動雙層巴士會免費接載乘客穿梭往返彩虹地鐵站及九龍灣零碳天地；想乘搭氫能巴士嘅朋友就可以透過網站登記，於指定時段喺啟德沐安街巴士站上車到九龍灣零碳天地，登記名額有限，有興趣嘅朋友就要快啲喇!
活動將會派出新能源巴士作為穿梭巴士
(資料圖片)
今次「綠色出行 零碳未來」新能源巴士體驗日暨嘉年華，目的就係配合政府提倡「2050年前實現碳中和」嘅目標，透過試搭新能源巴士及各種活動，推動「實踐綠色出行」，除咗可以親身體驗新能源巴士之外，嘉年華嘅節目亦不容錯過，包括同汽車有關嘅「太陽能電動小車」工作坊，參加者可以藉住嘗試裝嵌一架太陽能車仔，了解吓太陽能板點樣將陽光轉成電能驅動。
「太陽能馬賽克小夜燈工作坊」就俾參加者通過製作太陽能馬賽克裝飾小夜燈，學習可再生能源的知識，一次過學習環保同藝術。
仲有零碳天地 STEAM 互動空間嘅工作坊，一次過從裝備、創意、互動、機動四個領域，俾參加者同時了解環保、低碳、可持續發展嘅綠色概念。
不過咁，三個工作坊都係俾年齡18歲或以下嘅小朋友參加 (12歲以下必須由家長陪同)，當然現場亦會有適合不同年齡人士嘅活動！現場會設有多個展覽攤位，除咗有得玩之外，仲可以收集電子印花，集齊三個之後再參加一個小測驗，就可以即場換領紀念品一份。紀念品共有三款選擇：
1) 1:120 城巴電動巴士模型
2) 1:120九巴電動巴士模型
3) 「碳中和」福袋 (環保袋+手機掛繩+便攜毛巾+重用餐具）
記住紀念品數量有限，換完即止。所以想攞到嘅就要把握機會。
想去嘉年華及體驗新能源巴士，即刻上「綠色出行 零碳未來」新能源巴士體驗日暨嘉年華網站了解詳情！網址： https://newenergybusexpday.com/
______________________________________
「綠色出行 零碳未來」新能源巴士體驗日暨嘉年華活動詳情
日期: 2024 年 3 月 2 日 (星期六)
時間: 下午1 時至下午 6 時
戶外表演時間: 下午2時30分
地點: 建造業零碳天地
詳情: https://newenergybusexpday.com/
Be the first to comment