旗下一部同款、甚至可能係同一部嘅旅遊巴
(Source: Superior Coach & Tours Pte Ltd Facebook page)
李卓興响新加坡辱罵保安事件，呢度當然無乜嘢講。不過呢件事就引起咗我哋嘅「手痕」做一啲新加坡當地關於旅遊巴方面嘅 Town Planning 研究，事關睇返晒整宗事件嘅資訊，包括網上流傳影片與及新加坡當地傳媒嘅報導，事發地點「裕廊戰備軍協俱樂部」(SAFRA Jurong) 嘅管理公司指出兩樣同旅遊巴有關嘅資訊，第一係話上落客區可予旅遊巴士駛入上落客；第二係話「不過無巴士泊位，旅遊巴落咗客必須駛走」。
就第一點，管理公司話可以駛入，但涉事嘅旅遊巴公司話「有揩車風險，要賠錢，所以唔入」。到底係咪容易碰撞，唔太深入考究，但從 Google 街景去睇，理論上係足夠一部長度12米嘅巴士駛入，至於落客後駛走，基於 Google 街景反映嘅空間，如果部巴士「好軚」的話，理論上可以「一手搞掂」。至於涉事嘅嗰部有可能係 Isuzu LT434，可能爭少少，但應該都唔需要車前褪後好多次。
睇返 SAFRA Jurong 嘅歷史，呢個會所係响 2009年落成。上落客區嘅空間，理論上已預計有大型巴士駛入。至於無規劃到巴士泊位，令到李卓興連同啲師生以至其他訪客落咗車之後，巴士就要駛走。都可以話係一項缺憾。引伸出嚟去到第二點。
巴士落晒客之後，司機要揸走架車，係咪好頭痕呢？响香港就 more than 99% 係，但响新加坡就未必需要，事關新加坡政府對於運輸業、職業司機可謂照顧周到，四圍都會有 HVP – Heavy Vehicle Parking 重型車停車場。而响 SAFRA Jurong 附近就搵到三個。
地圖 screenshot 顯示埋路線嘅 Jalan Bahar 同 Fourth Chin Bee Road。另外仲有一個因為 Google 顯示路線錯誤而無標示嘅 Chin Bee HVP，位置响 Fourth Chin Bee Road 上少少個 P 字標記嗰度。用 Google 衛星做「篤手指 counting」，三個 HVP 合共提供近二百個大車泊位。
HVP 除咗俾車主可以申請季租之外，0700-2200 之間仲提供時租。目前全坡劃一收費 SGD1.2 / 30mins，同香港嘅街邊錶位差唔多。
雖然呢三個 HVP 距離 SAFRA Jurong 唔算好近，但因為「集中」同「泊位夠晒多」，而且路線都相當直接，司機真係唔駛愁落咗客之後要留响車或「錶板擺低 $400 行咗去」。而且响0 Jalan Bahar HVP、Chin Bee HVP 過條馬路就有商場、殼卡腥他 (Hawker Centre，小販中心)，司機唔駛擔心無嘢食、無 Toilet 要「塞膠樽」。以至當乘客或導遊「call 埋」，亦都容易返到去 SAFRA Jurong 上客，算係司機、乘客，以至其他道路使用者都得益嘅多贏局面。
相對於香港落咗客之後嘅苦況，响新加坡做旅遊巴司機真係可以又再三 replay 吳國敬嘅廣告歌詞「那裡會是個天堂，新加坡」 出嚟大唱，而且可以唱得特別大聲。
最後，點都要抽一句，請問中国香港特区政府就旅遊巴以至其他中大型商用車嘅泊車規劃問題，幾時先至真係實踐董伯伯嗰句「向新加坡學習」呢喂?!
Be the first to comment