【綜合英國外電】英國中西部馬詩西郡 (Merseyside) 响當地時間早上大約08:30發生嚴重車禍，一部接載住54名乘客嘅旅遊巴士沿M53公路前往威利斯 (Wallasey) 途中，响賀頓市 (Hooton) 出入口以北嘅路段同一部私家車相撞之後衝向路邊翻側。車禍造成兩人死亡，分別係巴士司機及一名14歲女童；逾50人受傷，包括一名相信為教職員的成年女乘客及另一名女學童傷勢嚴重。
馬詩西郡警方及消防救護接報後立即出動前往救援，當救護隊伍抵達意外現場評估情況後，隨即透過郡政府方面聯絡毗鄰的利物浦市政府戒備及提供協助。除咗派出多部救護車之外，另派出兩部救護直升機協助救援，其中39名傷勢較輕嘅學童，分別送往就近的卓斯特伯爵醫院 (Countess of Chester Hospital) 及雅露園醫院 (Arrowe Park Hospital) 敷藥後出院，其餘傷勢較嚴重的則送往利物浦艾德希兒童醫院 (Alder Hey Children’s Hospital) 救治，其中一名14歲女童送院搶救後證實不治；至於肇事嘅巴士司機亦在意外現場證實死亡。
出事嘅巴士當時接載 West Kirby all-girls grammar school 及 Calday Grange all-boys grammar school 兩間中學嘅學童前往參與活動，為幾部巴士的其中一部。
Credit: David Slatter
從電視畫面判斷，出事嘅巴士屬於 Carvers Coaches 公司嘅一部 Irizar i4 城際通勤巴士。Cavers Coaches 曾經購入多部來自香港城巴嘅二手利蘭 Olympian，但從網上搵到嘅資料顯示使用及保養情況可謂慘不忍睹。
警方响英國時間中午召開記招講述意外嘅初步調查及拯救經過。英國各大傳媒與及地區報章、新聞網站亦大篇幅報導，不過就未有一如香港嘅報館為進一步擴大版面邀請甚麼學者磚家說三道四或教授工程師計算中學物理科算式，政客亦未有衝出嚟廢噏要加強巴士安全裝置、收緊公路車速云云，而只有在社交網站或接受傳媒訪問時作出慰問，當中包括教育大臣喬芝蘭 (Gillian Keegan)。
Be the first to comment