本身我都唔想响巴士台呢度寫一啲好 Hardcore 嘅嘢，但舊年响我個人 FB Page 出 post 力數怪獸家長啲「鹹魚所為」，引起網上以至現實坊間巨大迴響，正常而言啲老豆老母應該會收歛一吓，誰不知嚟到今個學年，開學未夠半個月，從多家較熟絡有做校巴生意嘅旅遊巴公司方面得悉，啲怪獸家長不單無收歛其以為「俾咗錢大L晒」嘅思維，仲要似乎响學校縱容之下變本加厲，就是因為直接同巴士行業有關，唯有直接响巴士台「開大火」炮轟。
首先回顧返我响舊年講過啲乜
今個學年發生咗啲乜嘢事？舊年個 post 嘅 pt. 13 响開學前當然已經發生
13. 校車公司打算新學年加價，當然嘈，然後唔夠司機保母開工，唔好話外判俾行家「攝位」，執柯打「兩架車做三架車甚至四架車嘅嘢」總之無超載、準時返到學校，只係可能要個細路返學提早10分鐘上車/放學遲10分鐘返到，又嘈
收費根本就係因為「重償招勇夫」招聘司機、保母而焗住要加。當然，唔少家長嘈生晒，總之思路一如2016年黃埔花園19懶巴閉中產對於捷輝小巴申請加價嘅嗰種反應
你要出高人工請司機係你嘅事
唔好要我俾多一個仙
有啲車公司職員好聲好氣解釋「因為人工、油錢、保險 bla bla bla 乜都貴晒….. 體諒吓啦」，依然換來一啲怪獸家長粗聲粗氣發花癲。有啲車公司老早預計到啲「鹹魚」會講乜，索性老實不客氣的表示
你唔願俾唔緊要，但我哋真係請唔到司機保母的話，你自己諗辦法送個細路返學啦
雖然啲老豆老母死死氣焗住俾，但一開學就向校方投訴「呢間車公司收咁貴又服務差，下年換過另一間啦」。
無錯，歷史係不斷重演。除咗錢，舊年個 post 嘅 pt. 9 – 11 something about 上落車位置嘅問題，開學前亦都嘈到拆晒天
9. 上落車一定要幾乎响正屋企門口。過條馬路、行一個街口，總之 walking distance within 5分鐘，唔得。e.g. 海逸豪苑20座一個，前少少23座又一個。
10. 深盛路朝早塞到仆街就係呢個原因，上去泓景臺執兩三個，落返嚟轉入碧海藍天上一兩個，然後圈返出嚟上昇悅居又係一兩個；七、八個一炮過响深盛路上晒慳返最少五分鐘嘛，啲老豆老母就係一句「我有俾錢㗎！」
11. 聽過 (from 行家) 一個我認為最誇張嘅case 黃埔花園十二期 (家居庭)，唔肯行過去二期 (按：應該係十一期，叫慣咗口) body shop 都算，過對面馬路十一期吉野家前少少都唔得，焗要架車兜大圈
先此聲明，今個學年我無做校巴 (原因之一就係頂唔L順啲怪獸家長)，exactly 於海逸豪園、黃埔花園嘅舉例唔知仲有無發生，深盛路「塞到仆街」嘅情況依舊都只係聽聞，但上落車位置唔係响正屋企 (楝樓) 門口爭幾步路都唔制，叫校車公司「死掂佢」，就肯定持續發生 (唔係都寫唔到呢篇文)。
Exactly 地點就不便透露 (費時有蛛絲馬跡 check 到邊間公司爆料)，姑且舉例比喻式說明一下：
例1. 校巴公司定咗 置樂花園 952總站後面 as 置樂連埋麗寶、利寶合共八個學生。但兩個分別居於彩華花園A座及C座嘅老豆老母要求篤到入去青善街停正楝樓門口，校巴公司表示車程多咗約兩分鐘，你帶個細路行過去置樂嗰度差唔多時間…..
兩個怪獸鹹魚當然又係嗰句「我有俾錢㗎」，校巴公司本來就範話响街口俾呢兩件「鑲金的菠蘿」上落車，但呢兩隻鹹魚老豆老母除咗繼續堅持「俾咗錢大L晒」，就話一句「要我個細路過馬路咁危險，有乜嘢事係咪你 (校車公司) 負責？」
例2. 校巴公司定咗涌美路上山方向「長康邨康富樓」巴士站，一個居於對面青衣救護站側村屋嘅唔知老豆定老母又係要求「停正門口」，仲同校巴公司講「掉個頭之嘛，有幾難呀，私家車一手搞掂啦！」校巴公司職員回應表示巴士站前面有禁止掉頭路牌…..
但都未講晒，條鹹魚話「唓，個個都係咁掉㗎啦，怕差佬嘅咪駛入去上高灘街掉囉」。可是因為整個青衣島嘅「仔數」超過30，校巴公司必須要用大車 (如下圖舉例)
於是老闆親自回覆呢條鹹魚：
我哋架係大巴士，唔係私家車
如果你有巴士牌的話，我可以安排部車上嚟俾你示範一吓點樣掉頭
豈料呢條鹹魚唔止向學校投訴，仲直接以「家教會高層成員」身份向校長、校監要求校方立即同校巴公司解約。校方約見校巴公司老闆了解 (定施壓就唔知喇)，老闆表示
就算我個司機有本事响嗰度調頭俾佢個細路上車，跟住要上山去青華苑、長青邨…….，兜多起碼10分鐘。一係全車細路日日遲到最少10分鐘，一係就翠怡、海悅、青怡….一直數返去長安長發嘅小朋友提早最少10分鐘上車…..
校長、校監定唔知校董會乜水為之語塞
撇除武汉肺炎，唔少旅遊巴公司响過去五年嘅經營狀況都係「掹掹緊」，所以對於啲怪獸家長嘅惡行都忍氣吞聲 「就得幾多得幾多」。而嚟到今個學年，經過「武肺」蹂躪，加上移民潮致收生數量下跌，唔單止校車公司捉衿見肘，唔少學校更深怕被殺校，為求自保只好縱容啲怪獸家長無理取鬧，該可解釋到今年「鹹魚肆虐」更為嚴重。
話說回頭，若家長們思想不是如斯劣質的「恃財欲霸」，又豈會做出呢啲不L之所謂嘅事情出嚟。也許腦部稍正常的會問道「不怕對小朋友立壞榜樣嗎」？也許只好「政治上腦」去講，做得出呢啲所為嘅父母、長輩不過是承受晒「共产党之下就是誰大誰惡誰正確」嘅價值觀，根本唔會認為咁做係錯。但無論佢哋如何堅持「有錢大L晒」都好，佢哋為件 Golden Pineapple 俾嘅錢只係校巴，唔係的士，更唔係 Uber Black / 合法嘅 Limousine。
若要「算死草」去狠批佢哋「一個月俾一千幾百咋，一程的士無一百都幾十，圍埋條數一個月兩三千銀」。想俾我有時餵阿B嘅池魚 (一斤4至5條唔駛 $30) 嘅價錢食沙巴蘇眉？睇怕今晚早啲瞓但周公 X 到你起身。
2 Trackbacks / Pingbacks