今年 IMXHK 有咩關巴士事？

今年「IMXHK 香港國際汽車博覽 2022」除咗喺亞洲博覽館設有室內場地外，喺西九龍文化區亦設有戶外展場。喺戶外展區上，除咗有飄移賽車體驗、汽車文化市集、電動車露營展示之外，亦都泊有一部氫燃料電池電動巴士。

當一眾汽車傳媒收到採訪通知後，都以為展出嘅係早前遠赴澳洲展出嘅城巴威馳騰 WSD6121BR3FCEV 氫燃料電池雙層巴士之際，原來一切都只係一個美麗嘅誤會！廠方派出嚟展場展出嘅，係一部過境香港嘅左軑氫燃料電池單層巴士－WSD6122BL1FCEV。

巴士設計同一般中国生產，出口到外地嘅柴油單層巴士規格相似，使用歐洲式塑膠薄身座位，地下鋪上仿木紋防火膠板，全車設有 27 個座位。駕駛室採用德國 DIN 標準式儀錶板，速度錶及電量錶中間，設有彩色屏幕提供行車資訊。雖然車廂內部以歐洲式規格為主，但軑盤上就鑲上 HYZON Motor 呢個北美嘅氫能汽車牌子，而手掣亦都用上常見於北美巴士嘅接壓式手掣。

外觀上，呢部氫燃料電池單層巴士方正嘅車身外型配上「冂」形輪拱，同本港相同牌子嘅電動雙層巴士喺設計語言上可以話有丁點關連，但頭幅造形上明顯有所不同。頭燈由鐮刀形變成梯形，感覺更加大方得體。而威馳騰 Weisheit 橢圓形標誌下面，就採用浮雕式嘅三角星排列，加上泵把左右兩邊嘅仿氣壩式造型同 LED 日行燈，望落真係有啲德國風格。車頂除咗放置車廂冷氣冷凝器組件外，亦都將液態氫燃燒缸擺喺車頂上面。呢個做法其實係基於安全考慮，雖然氫燃料缸所用嘅物料經測試係異常堅固同防火，但萬一有火警或洩漏的話，由於氫氣比空氣輕，所以氫氣會向上升，引發嘅火焰亦都只會向上空燃燒，減低車廂受波及嘅機會。

方正嘅車廂外型配上「冂」形輪拱，同本港同牌子嘅電動雙層巴士喺設計語言上可以話有丁點關連

至於動力同續航里程方面嘅數據，筆者喺亞洲博覽館會場上嘅威馳騰攤位以及西九龍文化區嘅戶外展場上都搵唔到呢部車規格資料或者展板，而有同業曾經向廠方代表查詢詳細規格，但至截稿前都未有回覆。如果廠方同展方可以喺巴士旁邊豎立一塊小小嘅展示牌稍作介紹，咁就更加好喇！

呢部威馳騰 WSD6122BL1FCEV 氫燃料電池單層巴士將會喺「IMXHK 香港國際汽車博覽 2022」西九龍文化區竹翠公園展場內展出。而喺赤鱲角亞洲博博館會場內，亦有城巴嘅威馳騰 WSD6121BR1EV 純電動雙層巴士（車隊編號 8910）喺威馳騰攤位，以及已退役嘅利蘭奧林比安 11 米非空調巴士「老虎蘭」喺 Tiny 微影攤位。Tiny 微影攤位上亦有兩款會場限定嘅 1:110 巴士車仔發售。