港鐵（MTR）致力提供服務照顧唔同乘客出街嘅需要，共建友善搭車環境， 為咗方便攜帶寵物出街嘅乘客能夠同埋寵物一齊享受便捷舒適咁搭車，由 2025年5月1號開始，港鐵喺輕鐵全綫試行接受乘客喺額外購買「貓狗同行證」之後，按照細則攜帶1隻寵物貓或狗乘搭輕鐵，初步試驗為期2個月 。（導盲犬以及警犬除外）
「貓狗同行證」售價港幣99蚊，係1個電子而非實體憑證，有效期為每張「貓狗同行證」上所顯示嘅公曆月並且唔會自動續期，每位持有「貓狗同行證」嘅乘客可以喺嗰個公曆月入面嘅星期六、日或公眾假期，按細則攜帶1隻貓或狗無限次乘搭輕鐵，每名乘客只可以購買當月以及下1個月嘅「貓狗同行證」各1張。
如果要攜帶貓狗乘搭輕鐵，乘客需要喺進入輕鐵鐵路處所前：
・確保已經持有當月有效嘅「貓狗同行證」。
・每位持有「貓狗同行證」嘅乘客只限攜帶1隻寵物貓或狗乘搭輕鐵。
・乘客必須將貓或狗完全放入合乎行李規章嘅專用袋（專用袋長闊高相加尺寸總和唔可以超過 170 厘米；任何一邊長度亦唔可以超過 130 厘米）並且完全閂實或冚好，確保攜帶嘅寵物身體任何部分都唔會外露。
・為保障寵物安全以及考慮其他乘客，乘客全程都唔可以再打開寵物袋，直至離開輕鐵鐵路處所範圍。
「寵物貓狗同行試行計劃」由2025年5月1號開始，所有嘅星期六、星期日以及公眾假期適用，範圍涵蓋「屯門發現號」假日限定旅遊專綫以外嘅所有輕鐵路綫。
然而使用「貓狗同行證」攜帶寵物貓狗乘搭輕鐵嘅乘客需要留意，如果乘搭「1卡車」嘅輕鐵列車，必須喺車尾最後一道車門上落車；如果乘搭「2卡車」嘅輕鐵列車，則必須喺第1卡或第2卡最後一道車門上落車。港鐵表示會喺輕鐵列車車廂相關車門貼有標記，提示攜帶寵物貓狗嘅乘客喺指定車門上落車。
港鐵表示，其他港鐵路綫並未納入寵物貓狗同行試行計劃，乘客千祈唔好攜帶導盲犬或警犬以外嘅寵物乘搭其他港鐵路綫。
港鐵亦都強調，使用「貓狗同行證」嘅乘客需要注意：
・乘客喺出街前以及搭車期間都應該衡量並且時刻留意寵物貓或狗嘅身心狀況是否適合乘搭輕鐵。
・乘客個人必須如常使用八達通卡拍卡或者使用單程車票畀錢搭車，「貓狗同行證」並唔能夠代替乘客嘅個人有效車票，亦唔包括喺「公共交通費用補貼計劃」之內。
・乘客唔可以使用任何寵物車或有轆嘅載具（例如「買餸車」）去運載寵物進入輕鐵鐵路處所範圍。
・乘客應該保持輕鐵鐵路處所環境乾淨以及衞生，並且自備清理工具用以妥善處理寵物貓或狗有機會產生嘅污物。
・港鐵職員有權要求身處輕鐵鐵路處所嘅所有乘客跟從指示出示有效「貓狗同行證」、檢查寵物袋規格，或拒絕唔符合規定者進入輕鐵鐵路處所。
・如果乘客未能遵守條款以及細則，可能會被港鐵檢控或罰款。
「寵物貓狗同行試行計劃」嘅第1日，港鐵請嚟亞洲動物基金（Animals Asia）旗下「狗醫生」項目志願者、香港愛護動物協會動物義工出席啟動儀式並且示範點樣正確使用「貓狗同行證」。
另外亦有一般市民按照條款細則使用「貓狗同行證」攜帶寵物乘搭輕鐵，輕鐵職員都有檢查乘客有無按照規定，並且主動協助乘客喺上車前處理好寵物入袋嘅工作。
港鐵喺2025年6月23號表示，自從2025年5月起喺輕鐵推出為期2個月嘅「貓狗同行」試行計劃，方便乘客喺假日攜帶貓狗寵物出街，推動社會共融，港鐵感謝乘客支持以及配合，自從試行計劃推行，市民普遍反應正面，輕鐵整體運作維持暢順，社會各界亦認同措施以及相關安排。港鐵檢討計劃並且整合分析自2025年5月推行試行計劃以嚟所收集嘅意見。為進一步收集意見，港鐵延長試行計劃直至2025年8月底暑假結束，以參考市民唔同出街搭車嘅模式下「貓狗同行」計劃嘅實行情況。
自試行計劃推出以來，港鐵表示透過唔同渠道，收集乘客、貓狗主人以及相關人士嘅意見，並且安排觀察員乘搭輕鐵。 輕鐵職員亦喺重點車站協助有需要嘅乘客。據港鐵觀察，絕大部分貓狗主人都遵從相關規則，包括喺指定時間、指定位置以及指定方法乘搭輕鐵。港鐵感謝乘客支持以及配合，並會繼續密切留意計劃嘅運作情況，有需要時會執行相關規例，確保為乘客提供安全舒適車程。
根據本台2025年7月初走訪「大西北」嘅小規模街訪，意見其實「幾兩極」：
- 本土出世長大、年青、受過較高等教育嘅乘客普遍支持「貓狗同行」，認為係現代人類文明發展嘅重要一步，當中有唔少意見指出「香港行得太慢」、「同先進國家相距太遠」；
- 非本土出世長大、年長、教育程度較低嘅乘客普遍反對「貓狗同行」，認為有違中國傳統看待「畜牲」嘅態度，當中有意見指出「善待動物係『漢奸』行為」，屬於危害國家安全。
唔知大家又有咩意見？
Be the first to comment