人氣動漫吉伊卡哇（CHIIKAWA，以下按香港本土習慣稱作「痴卡哇」）熱潮席捲亞洲，香港港鐵公司喺2025月7月9號宣布同AllRightsReserved再度合作，配合 「CHIIKAWA DAYS大型特展」喺港鐵推出一系列「CHIIKAWA DAYS站站遊蹤」暑假主題活動，包括率先喺2025年7月12號帶嚟「CHIIKAWA DAYS」主題輕鐵列車，車廂有可愛角色痴卡哇、小八、兔哥以及一眾好友嘅蹤影，陪伴乘客探索社區，創造獨特歡樂回憶！
港鐵公司喺2025年7月9號下晝2點假輕鐵兆康站4號月台為「CHIIKAWA DAYS」主題輕鐵列車舉行啟航禮，列車駛入月台嘅時候吸引唔少市民圍觀「打卡」。
港鐵公司總經理——市場策劃及收益管理趙敏女士喺啟航禮上表示：「我哋好高興能夠參與今次嘅『CHIIKAWA DAYS大型特展』，繼早前支持主辦單位喺車站派發免費紀念品，今日再推出『CHIIKAWA DAYS』主題輕鐵列車為特展做第一波預熱，車上佈滿大人小朋友同埋粉絲們喜愛嘅痴卡哇以及一眾可愛角色，陪大家進一步發掘屯門、元朗以及天水圍社區嘅獨特美景。踏入8月，我哋將配合特展推出第2波活動，仲會喺指定車站以獨特方式歡迎大家，希望為全港市民以及旅客帶嚟更多驚喜，敬請期待！」
「CHIIKAWA DAYS」主辦單位以及AllRightsReserved創辦人林樹鑫（SK Lam）喺同一場合就話：「『CHIIKAWA DAYS大型特展』嘅主題劃分為『衣、食、住、行』四大生活面向，而我哋特別將『行』嘅概念延伸至香港市民日常最常使用嘅交通工具——港鐵。痴卡哇同夥伴們每日面對『打工、討伐、考證』嘅循環，呢種『打工上班日常』恰恰呼應香港上班族通勤以及學生通學等嘅生活節奏。通過同港鐵公司嘅合作，我哋將痴卡哇以及好友們嘅歡樂氛圍帶入列車車廂，畀更多市民同埋旅客能夠同呢啲可愛角色相遇，同埋相互打氣。」
暑假限定「CHIIKAWA DAYS」主題輕鐵列車喺2025年7月12號到2025年8月31號期間同乘客見面。主題輕鐵列車平日會穿梭屯門、元朗、天水圍各輕鐵路綫，乘客可以如常畀平日嘅車費乘搭；至於周末期間主題列車就會行走輕鐵「屯門發現號」旅遊專綫，方便一眾痴卡哇支持者搭車「打卡」。
有興趣乘搭「CHIIKAWA DAYS」主題輕鐵列車體驗「屯門發現號」旅遊專綫嘅乘客，只需要喺活動期間嘅周末去到輕鐵兆康站，即場以港幣50蚊購買「輕鐵旅遊證」套裝，就可以乘搭「CHIIKAWA DAYS」主題輕鐵列車探索周邊社區。
乘客可以憑證嘅當日指定時段乘搭「CHIIKAWA DAYS」主題輕鐵列車以及無限次乘搭其他輕鐵路綫，而且仲可以獲贈限量「CHIIKAWA DAYS」主題紀念封套以及貼紙、MTR e-Store 門市以及指定港鐵站商店購物優惠券。
「CHIIKAWA DAYS」主題輕鐵列車車身以故事當中嘅日間森林做背景，痴卡哇、小八、兔哥拎着討伐棒，同正係享受美食嘅好友同框，歡迎乘客一同進入痴卡哇世界。
「CHIIKAWA DAYS」主題輕鐵列車車廂入面都有痴卡哇、小八、兔哥同埋其他角色嘅圖案，加上宣傳「CHIIKAWA DAYS」嘅字句，配合埋「CHIIKAWA DAYS」主題紀念封套就真係好歡樂喇！
但係大家要留意，「屯門發現號」旅遊專綫每個班次設有載客上限，「輕鐵旅遊證」套裝會因應有關上限而限量發售，先到先得，售完即止。
港鐵喺2025年8月推出更多精彩活動，包括痴卡哇一眾可愛角色現身多個港鐵站，以及推出各位支持者以及鐵路迷期待嘅主題紀念品等。
2025年7月9號下晝嘅啟動禮完結之後，港鐵公司安排咗編號1133嘅「CHIIKAWA DAYS」主題輕鐵列車繼續停喺輕鐵兆康站4號月台畀到場嘅公眾率先參觀，除咗唔少家長都帶埋小朋友到場之外，一班交通迷仲蜂擁而至衝入車廂…
而喺芸芸參觀者當中，相信呢位都算係最「畀面」：
畫咗幅畫祝賀痴卡哇經過3次考試之後
終於通過除草檢定5級考試！
CHIIKAWA DAYS「輕鐵旅遊證」套裝購買詳情
| 發售日期及時間 | 2025 年7月12號至8月31號期間嘅周六以及周日 每日0900時正開始發售至售罄即止 |
| 發售地點 | 輕鐵兆康站4號月台 |
| 售價 | 港幣50蚊（只接受電子支付），每人限買最多2套 |
| 內容 | ・ 「輕鐵旅遊證」一張（可於購買當日指定時段乘搭「屯門發現號」CHIIKAWA DAYS 主題輕鐵列車，並於購買當日無限次乘搭其他輕鐵路綫） ・（贈品）CHIIKAWA DAYS主題紀念封套及貼紙一份 ・（贈品）MTR e-Store門市及指定港鐵站商店購物優惠券 （套裝贈品數量有限，送完即止） |
Be the first to comment