「九巴彩虹回憶」帶「三門巨龍」重返彩虹邨

九巴舉辦嘅「九巴彩虹回憶」活動早前舉辦「大水牛」古董巴士快閃活動吸引唔少市民帶同一家大小到場參與。

有見及此，趁著2025年「夏日賞童遊」嘅首個周日（2025年7月6號），九巴再次舉辦快閃活動，除咗繼續展出2張懷舊巴士座椅之外…

古董巴士「三門巨龍」丹尼士巨龍12米亦停泊喺彩虹總站畀市民懷緬。

「三門巨龍」車廂設有「3+2」座位安排以及俗稱「水塘」嘅企位空間，載客量高達161人，配以「一上兩落」三門設計，加快乘客上落速度，適合行走乘客量高嘅路線。

多條曾經以彩虹做總站或途經彩虹邨嘅路線，喺1980、1990年代都會經常有「三門巨龍」出沒。

除咗「三門巨龍」重臨彩虹，九巴仲安排髹上仿「烏嘴狗」丹拿A型首代雙層巴士塗裝嘅「復古巴士」（MCV D123 富豪VOLVO B8L）喺活動當日主力行走203E號路線。

呢批巴士重現昔日以紅色為主、米白色以及綠色塗裝相間嘅色彩，配以九巴「九條龍」標誌，復刻1940、1950年代九巴率先引入雙層巴士嗰時採用嘅車身色彩，駛經彩虹邨時勾起一眾居民昔日乘搭九巴嘅經歷。

作為2025年「夏日賞童遊」嘅首個活動，以黃色做主調嘅「夏日賞童遊」主題巴士亦去到彩虹總站露面，車身上熱帶小島沙灘元素彷彿將彩虹變成夏日沙灘；再加上8-bit像素風格設計嘅「KMB GO！」主題巴士，齊齊同彩虹居民慶祝暑假來臨。

快閃活動舉行期間，九巴向到場市民派發印有「三門巨龍」駛經彩虹邨歷史圖片嘅明信片；市民只要喺Facebook或Instagram上載即日活動嘅照片，仲可以獲得1件「茶水站」塑膠立牌。

「夏日賞童遊」×「九巴彩虹回憶」快閃活動︰

日期︰2025年7月6號（星期日）
時間︰1400~1800
地點︰九巴彩虹總站（前・#茶水站 旁）