話說喺2021年5月20號，由1888年開始服務香港人以至國際遊客嘅香港山頂纜車宣佈進行最後階段嘅升級工程，香港山頂纜車會喺同年6月28號開始暫停服務，喺往後嘅日子有唔少市民都蜂擁去打卡送別，期間仲曾經有人罔顧安全進入路軌拍攝。
就係2021年6月27號山頂纜車第5代車廂最後服務嘅嗰一日，香港山頂纜車迎嚟咗超過11,000人次嘅市民，歡送第5代車廂。而喺山頂纜車正式暫停服務之後，仲有市民為一己之樂踩單車沿住路軌上山，行為未免令人「搖頭嘆息」。
最初山頂纜車公司滿懷雄心壯志，希望可以喺半年之內完成整個工程，然而香港以至全世界都遭受到新型冠狀病毒（武漢肺炎）嚴重打擊，唔單止無晒國際遊客，就連工程進度都大受影響。
原本香港山頂纜車一度諗住可以喺2021年聖誕節左右恢復服務，無奈工程進度受「疫情」以至天氣等因素嘅影響，新建造嘅第6代車廂要喺2021年11月底、2021年12月初分2日吊運上去路軌，相關嘅車廂運行測試亦要一直延後到2022年3月先至正式進行。
等咗咁耐，終於迎嚟咗We Meet Again嘅日子喇！
時間嚟到2022年8月18號，香港山頂纜車公司發出新聞稿，表示萬眾期待嘅第6代山頂纜車車廂將會喺嚟緊嘅2022年8月27號隆重登場，標誌著香港其中一個最受歡迎嘅旅遊景點正式邁向新里程。
香港山頂纜車公司表示以全新面貌亮相嘅第6代山頂纜車承載現代經典設計概念，配備煥然一新嘅總站同埋升級設施，勢必令訪客有更好嘅體驗，並且以更大載客量來迎接世界各地遊客。
為提供更愉快舒適的體驗，山頂纜車進行了一項耗資港幣7.99億元嘅重要升級發展計劃——包括更換動力、控制、信號系統、纜索、軌道，以及翻新中環、山頂2個纜車總站，以配合載客量更大嘅新纜車車廂。
擴建後嘅中環總站室内候車區可容納多達 1,300 人，更重要嘅係月台以及車廂地台變成喺同一高度，更方便傷健人仕乘搭山頂纜車。
新嘅山頂纜車中環總站除咗將乘客候車時間大大縮短超過7成之外，遊客更可以喺中環總站內享受到充滿活力、豐富吸引力嘅全新視聽娛樂體驗，中環總站嘅全面重建計劃經精心設計，旨在為本地和非本地遊客提供難忘乘車體驗。
山頂纜車中環總站新設計嘅五大體驗區域一覽
無限之眼 雕塑展覽
由澳洲華裔藝術家李林迪女士創作、高度超過10米嘅雕塑作品《無限之眼》會放喺中環纜車總站入口作開放展覽——作品受香港嘅飛躍精神所啟發，並且呈現不斷變化嘅燈光效果——不過筆者就突然間諗起2016年嘅科幻片《天煞異降》。
躍動的心 動力及拖曳系統展示
山頂纜車公司製作咗一段多媒體影片，以聲音、影像展示山頂纜車由1888年至2022年期間車廂、動力、運作系統嘅演變，介紹每個時期嘅纜車設計以及運作模式。
經典重現 第一代山頂纜車複製品
等緊乘搭山頂纜車嘅乘客，可以趁著空檔，企上去呢一個模仿第1代山頂纜車車廂嘅裝置，利用21世紀先進嘅智能電話，幫自己扮去返當年嘅情景「打卡」，感受香港昔日情懷。
穿梭時空 山頂纜車歷史
排緊隊嘅乘客可以透過超寬闊、高畫質螢幕，收睇用咗「視差捲動」技術重現山頂纜車起源嘅影片，有如親歷其境咁樣穿越過去，重溫香港、山頂纜車過去100幾年嘅重要歷史時刻。
太平山綠色寶藏 沉浸式展示幕牆
環繞式影像為遊客帶嚟沉浸式體驗，畀遊客置身喺太平山多樣化動植物嘅超現實世界當中。等緊車嘅乘客喺舒適嘅環境之下探索山頂上野生動物、雀鳥、昆蟲，仲可以體會太平山日與夜。
香港上海大酒店有限公司孫漫天先生表示：「我哋對第6代山頂纜車面世感到非常興奮，對於呢個自1888年起服務香港市民以及遊客、備受喜愛嘅城市標誌嚟講，呢次係一個重要嘅歷史里程碑。山頂纜車一直以嚟都係遊客必到景點之一，而我哋相信呢次發展計劃能夠將佢提升到一個全新水平，成為世界上其中一個提供最好遊客體驗嘅旅遊景點。」
山頂纜車有限公司總經理曾瑛美女士表示：「我哋熱切期待香港市民同埋遊客到訪，親身體驗全新山頂纜車、中環總站引人入勝嘅全新視聽娛樂、由澳洲華裔藝術家李林迪女士創作嘅巨型雕塑《無限之眼》，以及山頂凌霄閣及摩天台 428。為表達我哋對香港人嘅感謝，並喺疫情期間對大家嘅鼓勵，我哋特意推出一系列開幕優惠。我哋有信心香港市民會鍾意第6代山頂纜車嘅全新搭乘體驗、煥然一新嘅外觀設計，尤其係大幅改善嘅車站設施、候車區以及整體遊客體驗。」
根據2022年8月18號下晝喺中環總站所見，香港山頂纜車嘅職員已經貼出告示，提醒市民第6代山頂纜車會喺2022年8月27號星期六朝早11點鐘正式投入服務。同一時間職員亦都喺靠近香港公園嘅紅棉道天橋底重新拉起咗方便乘客排隊嘅圍繩。
第6代車廂仍然繼續頻繁上落山試車，明顯睇得出山頂纜車公司一絲不苟咁準備好迎接市民重新乘搭山頂纜車。
加價之後：山頂纜車為香港市民而設2個月優惠
為感謝香港市民喺升級工程期間嘅支持，香港山頂纜車喺開幕階段推出一連串優惠畀香港市民，包括快閃網上優惠以及感謝香港通行證。
山頂纜車亦推出售價428蚊港紙嘅限量版「超級粉絲套裝」慶祝呢個起源於1888 年嘅悠長故事進入歷史新階段、為城市再造寫下新一頁。
有人話今次山頂纜車工程完咗之後又加價係「驚人到完全唔合理」，以加價幅度計又確實好聽落講得通喎！
但又話得說回頭，除咗話香港山頂纜車依家已經唔再單純係一個公共交通工具嘅性質，而變成一個旅遊景點之餘，其實山頂纜車由運作系統、路軌基礎、斜坡安全等預防性質嘅維修、保養、以及員工薪金等營運開支，著實唔係坊間一般營辦商可比。
面對相對平均每一個乘客而言極高成本，對比專營巴士以及專線小巴，香港山頂纜車當然難免要收取更高昂嘅車費嚟維持合理同安全嘅運作啦！
最重要係香港山頂纜車一向往績都係交得出一個令香港人以至其他遊客對香港留有良好印象、令人滿意嘅成績表喎！
2 Trackbacks / Pingbacks