九巴比亞迪 B12A 電動單層巴士於今日首航 6 號線，巴士公司隆重其事喺首航前喺尖沙咀碼頭舉行記者招待會。記者會上除咗簡介 B12A 嘅基本資料外，亦都闡述咗九巴喺短期同長遠喺「綠色運輸」上嘅取向同埋目標。承另文所提及，除咗今日首行嘅同款比亞迪 B12A 電動單層巴士之外，九巴亦都已經向中国嘅比亞迪同英國嘅 Alexander Dennis（ADL）訂購咗合共 52 部電動雙層巴士。
九巴向 ADL 訂購嘅會係 Enviro 500EV 型號，長度為 12米。消息指會採用 Proterra 商用車電池技術，配有電池水冷系統，可以有效管理同控制電池溫度，以延長電池壽命同提升效能。充電兩個半鐘就可以行走約 300 公里，總載客量約為 120 人。
而比亞迪就將會提供一款可載約 115 人嘅 12 米車型。電池除咗同樣配有水冷系統外，亦都使用比亞迪知名嘅「刀片電池」，以增加安全性之餘，亦因電池體積縮小而騰出更多車廂空間。而續航方面，比亞迪之型號就充電兩個半鐘，可以行走 320 公里，帳面上稍為比 Enviro 500EV 高。兩個型號嘅車頂同樣都會裝上 2mm 厚嘅太陽能光伏板，為車內裝置供電。
52 部新巴士將於 2023 年交付，連同現役及即將首航嘅電動單層巴士，屆時車隊將會有 82 部電動巴士服務乘客。九巴預計 2025 年前將會再引入四百幾部新能源巴士，令新能源巴士總數達到 500 部﹐佔車隊 12.5%。而九巴亦對氫燃料巴士持開放態度，將會同政府、巴士生產商，以及能源供應商探討﹐研究氫燃料巴士喺香港營運嘅可行性。目標喺 2050 年，九巴車隊將會全線使用新能源巴士，達致路邊「零排放」。
5 Trackbacks / Pingbacks