背景
1970年代，時任行政院院長蔣經國為咗改善臺灣基礎設施以及產業升級，推出多項重大基礎建設工程，史稱「十大建設」。
其中臺灣對外貿易日益發達，而國營「臺灣鐵路管理局」（臺鐵）面對公路運輸競爭，當年嘅蒸汽機車、柴油機車唔夠動力輸出而影響調度，唔能夠增加班次，令到每班車都逼滿人，仲經常唔準時，連帶難以處理貨物運送，造成多重困境。
臺灣政府為處理飊升嘅鐵路客貨運量，因此喺1973年起計劃鐵路電氣化工程，首先為西部幹線縱貫線全線（基隆←→高雄）架設長達1153公里嘅架空電纜，以一路施工、一路營運嘅方式，分段輸電通行，1979年6月27號全線通電試車完畢，1979年7月1號喺高雄車站舉行通車典禮，1979年7月2號西部幹線縱貫線全線鐵路電氣化正式啟用。
100：「自強」伊始
而因應呢一次鐵路電氣化，臺鐵喺開始推出取名自「莊敬自強，處變不驚」嘅「自強號」特快列車，當時有13組、合共65卡係使用由英國鐵路工程有限公司（British Rail Engineering Limited）連同英國通用電氣公司（General Electric Company plc）按照「英國鐵路2型客車（British Railways Mark 2）」為藍本生產嘅「臺鐵EMU100型電動列車」營運。
「臺鐵EMU100型電動列車」1977年2月由英國鐵路工程公司位於英國約克嘅工廠承造，1978年1~10月經海路運抵臺灣，並且進行一連串試車，1978年8月15號開始營運，並取代原本由「臺鐵DR2700型柴油列車」所行駛嘅「光華號」。
然而「臺鐵EMU100型電動列車」行駛未夠1個月就出現空調系統、機電系統故障問題，加上電源車主變壓器過重，削弱咗轉向架強度，影響到列車嘅行車安全，因此全面停用。臺鐵以及英國鐵路工程公司互相進行修改，歷時4個月，1979年1月2號「臺鐵EMU100型電動列車」重新投入服務，到1979年7月1號西部幹綫全綫電氣化通車，「臺鐵EMU100型電動列車」令「自強號」做出每小時120公里嘅速度，用咗4小時10分鐘走晒台北→高雄全程，打破咗「光華號」嘅紀錄。
200：擴展
不過就咁，正如當年香港推出「電氣化火車」，初期運力都曾經出現求過於供，臺鐵喺1980年代就同樣面對「臺鐵EMU100型電動列車」無法滿足客運需求嘅情況。
臺鐵為咗提升客運運力，於是喺1984年、1985年嘅年度預算撥款向南非聯邦鐵路客貨車公司（Union Carriage & Wagon）訂購11組、合共33卡（8組原廠生產、3組由臺灣唐榮鐵工廠代工組裝）嘅新電動列車，是為「臺鐵EMU200型電動列車」，1986年6月投入服務。
1200：改造
到了2000年，臺鐵引入使用「臺鐵E1000型電力機車」作為專用牽引機車嘅「推拉式自強號」之後，面對「臺鐵EMU200型電動列車」內裝設備老化以及各種缺失，臺鐵喺2001年開始進行招標改造。最後由唐榮鐵工廠、中國鋼鐵公司、日本車輛、住友商事合組嘅台灣車輛股份有限公司中標，由2002年開始到2004年將當年仲用緊嘅30卡「臺鐵EMU200型電動列車」全面進行改造更新，並且改為每組9卡，同埋更名為「臺鐵EMU1200型電動列車」。
當年嘅改造主要有：
- 將駕駛座正面駕駛車窗改為兩片式大窗
- 將原本手動式摺疊車門改為滑軌式自動車門
- 加設臺鐵第一款喺電動列車上面嘅育嬰室
到咗2002年底，第一批「臺鐵EMU1200型電動列車」開始陸續出廠，並且由2003年開始進行一連串測試之後，分批投入服務，一直到2004年全數30卡繼續喺西部幹線縱貫綫上服務。
1200：退役
隨著年事日高，服役近20年嘅「臺鐵EMU1200型電動列車」近年因為車況欠佳，去到2021年就只係淨返會行臺鐵167次（彰化=潮州）以及168次（枋寮=彰化）嘅1個來回車次，而且只係剩低1個編組（EMU1203+1204）可以正常行駛，所以偶然會因為車輛故障或者需做較高等級檢修就改用「推拉式自強號」替代。
「臺鐵EMU1200型電動列車」喺2022年3月28日執行167次（彰化=潮州）及168次（枋寮=彰化）後退出定期營運，最後1個車程由司機員孔令辰駕駛，喺1645時由枋寮車站開出。
「臺鐵EMU1200型電動列車」其中1個特色就係外觀塗裝有別於過去「自強號」電動列車使用嘅米黃色、米色、褐色3種顏色組合而成嘅啞鈴式塗裝，而採用以白色為主底色，下緣塗裝為紅色，而駕駛車正面附有橫紋橘色綫與白色綫交互穿插，車身左側塗上臺鐵英文簡寫「TRA」；因此「臺鐵EMU1200型電動列車」被臺灣鐵道迷稱為「紅斑馬」——未知「紅斑馬」可否返入「馬廐」再擇日重跑呢？
（封面照片撮自維基百科用戶「Jane9306」，按CC BY-SA 4.0條款使用）
1 Trackback / Pingback