九巴同埋龍運為吸引乘客搭多啲巴士，喺2020年10月推出「九巴龍運FUN分賞」活動，乘客利用已經登記嘅八達通卡乘搭九巴同埋龍運旗下嘅專營巴士，可以按巴士車資賺取積分，從而換取獎賞。
九巴連月來有更新計分方法同埋可以換領嘅獎賞，而且亦輾轉將活動結束日期推遲，最終「九巴龍運FUN分賞」活動喺推出1年後嘅2021年9月30號結束。
養慣咗一班儲積分嘅乘客就當然唔好嘥，早前九巴已經邀請乘客喺九巴．龍運智能電話應用程式加入新設嘅「club1933」，仲話如果下載埋母公司新鴻基嘅旗下商場智能電話應用程式兼登記做會員就再有額外積分。（即係轉個方法收集大家行蹤啦！）
至於講到有乜禮品可以換…玩具嗰啲就無咗好耐㗎喇！不過30個包裝口罩、九巴網上商店同迷你倉50蚊優惠券呢啲就繼續係主打。
早前九巴加入咗可以「用積分加少少錢」換領嘅禮品，包括消毒搓手液同30個盒裝口罩，而近日又加咗新禮品…
新禮品係飲食嘢，包括龜苓膏特飲同快餐店早、晚餐換領券，但係換領點就只限屯門市中心、沙田市中心、尖沙咀天星碼頭呢3個巴士總站嘅九巴顧客服務中心。
至於之前玩咗9個月嘅「打卡」換積分…係繼續有嘅…
2021年10月7號開始，又多一個「打卡」換積分方法：
用已登記嘅八達通卡繳付車資乘搭由九巴營運嘅過海路線巴士——不論係西隧、紅隧、東隧——只要喺上巴士拍卡後2個鐘頭內入返乘搭嗰架巴士嘅車牌（車輛登記）號碼，就可以再得1分。（不過可能要等8日先至入帳）
唔知大家覺得仲有無興趣陪九巴玩落去呢？
Be the first to comment