2021年6月28號，香港普降暴雨，香港天文台接連發出黃色、紅色、黑色暴雨警告，暴雨引致多區交通嚴重受阻。
其中啱啱喺6月27號全綫通車嘅港鐵屯馬綫，通車後第一個工作日就遇上暴雨，啟德站一早出現「漏水」，近A出口部份設備因此故障，有大約一半閘機無法使用。
港鐵回覆指，事件係源自前一晚收車後，到6月28號約凌晨 2:45 ，啟德站車站大堂有一條咸水管接駁位爆裂，引致有水由天花板空隙流落大堂，維修人員已即時閂水掣同埋搶修，乘客仍可使用部分閘機進入車站。港鐵指，水浸情況與今天的天雨無關，維修人員會繼續跟進。
不過遇上暴雨會令部份市民轉搭有蓋嘅港鐵，閘機少咗難免影響出入。（港鐵邊會咁好免大家拍卡先得㗎）
另一邊廂，大嶼山南部嘅長沙，因為暴雨導致山洪暴發，長沙大灘出現一道黃泥水瀑布。
途經長沙嘅嶼南道當然唔能夠倖免，山洪夾雜沙泥，令到嶼南道交通中斷，由網上流傳嘅影片可以見到，有途經嘅新大嶼山巴士受困。
運輸署表示，因山泥傾瀉，嶼南道來回方向近警方大嶼山南分區總部嘅全線封閉。朝早時間，新大嶼山巴士1、2、4、23號路線暫停服務，11號路線只提供由東涌開出到長沙同由大澳開出到塘福兩邊嘅有限度服務。
運輸署喺中午公佈，因應嶼南道山泥傾瀉，有下列臨時交通安排：
- 新大嶼山巴士2、4、23號路線暫停服務。
- 新大嶼山巴士1號路線有限度服務由大澳開出到塘福。
- 新大嶼山巴士11號路線有限度服務來往東涌站巴士總站開出到蝶崗。
為免南大嶼山居民出唔到城，運輸署已安排以下緊急渡輪服務：
由大澳到東涌(加開班次)
- 12:15
- 12:45
- 13:15
- 14:30
由東涌到大澳(加開班次)
- 12:30
- 13:00
由大澳到屯門(加開班次)
- 15:00
至於下午2時開出大澳—沙螺灣—東涌—屯門嘅班次仍然維持正常服務。
視乎嶼南道重開時間，上述緊急渡輪服務時間將再作延長。
其他地區亦唔見得好好彩：
- 屯門赤鱲角隧道公路，往屯門方向一度因為水浸而全線封閉，到朝早9點半左右，駕駛人士先至可以使用快線行車，部份龍運巴士需要改道。
- 港島區摩星嶺道來回方向近翠暉臺因為山泥傾瀉全線封閉。
- 港島區置富花園有冧樹，置富道一度全線封閉，城巴、新巴部份路線改道。
上述三處朝早交通繁忙，到近中午先至全面重開。
Be the first to comment